FTII nung lenitsü asoshi tazüng tashir nüngdaker: Shabana Azmi

October 04, 2015: Actress tejen Shabana Azmi-i, Film &Television Institute of India (FTII) nung lenitsü asoshi nisung kaji FTII nung shisatsü angur asütsüla, ta ashi.
Shabana Azmi-i ya taoba mapang FTII nung azüng aser lai, FTII nung teti agi shisatsü peria alir Shyam Benegal aser U R Ananthmurthy nunger amalai ania liasü.
“BJP-i parnok züngsemang kar anioknüa alitsü akok, ajisüaka iba menden nung amentsü asoshi tazüng tashir nüngdaker,” ta Malayalam television channel den jembiba mapang Azmi-i ashi.
Centre-i FTII nung tekolakba Gajendra Chauhan shimtsü ta mangatettep adokba tsütsü asüngdangba mapang lai, “FTII nung Shyam Benegal, U R Ananthmurthy aser Mrinal Sen nunger tekolak ser ania aru. Anungji tanga parnok amala nisung kar nüngdaker,” ta langzüa liasü.
Laisa linük nung politics agi nüburtem anisaba tebilemtsüa lemsatepa liasü.
“Politics agi nüburtem anisaba ajanga linük nung alirtem kanga temulung masür. Tang asen linük nung aliba sorkari nübur yaritsü kanga sashi jembir ajisüaka parnok mapa agibo yamaji meinyaker,” ta lai ashi.
Muslim amanger temi kentener A R Rahman anema ‘fatwa’ ken o benokba dak sentakba nung Azmi-i, “Ni iba mangatettep nung kü kijai asüyong Rahman pu asemer. Pa nem fatwa agütsürtemji shingaia retreta magiba nisungtem lir. Anungji media temia tapii iba ama nüngdak makaba nisungtemi jembiba magitsüla,” ta ashi.