Funeral service agiba

–  Er. C. Kazükaba Jamir, Dimapur.

Nisung sür külen tatembang o jembia sentep ka agiba dang mangzür ta ajar. Saka asenok ajaki pei oshi toktsür bendanger oshi agi funeral service ta dang tetshia arur. Anungji tang nungibo mangzür ta dang tetshitsü ajungshir. Aji dang masü tasür dak sendakba mapa kar nung temetongshitsü lir ta ajiteter. Mezüngbuba nung, yimya agi mangzüba sentep ya tatembang asünung tasüri inyakba indang tajung ajak shima jembitsü nüngdak. Ano tamajung kar inyaka lira akümlir tansütsü asoshi itemjia shitet asübo tajungba asütsü. Itemji ashitsü melena tasürji kotaki ogo ta dang shira mangzürtem temoatsü mangutsü ta bilemer
Yamaji akümli nung nüktapangtar, teyazü jembir, ochi mashir, ashi auer, külakküpbonger aser nisung tepseter ajak asenoki kotaki odaktsüra, molumi leni aorbo shinga malitsü aser asenoka kodang südir kotaki aotsü imlaa atatsüba dang.
Tanabuba nung, asenoki nebu aser rongsen agi tasür kibong yariba nungi parnoki tepela agi ta sür Arogo nem tenla agütsüba yabo tera mapet amai bilemer, kechiaser karibo Pa/La asüba atema pelar amai angatetsüa akok.
Tasembuba nung, tasürtem menungraa bilemteter ta sür küm ka ajungba, ana, asem, pungo aser ter ajungba ta tanen maka bilemteta arudagi. Karibo Nashi, Ak tepseta benjong ama amonger. Shibai metet tarutsü nung karibo Silver jubilee, Golden jubilee ta benjong tulu mongyonga aotsü südi. Aji dang masü osang kaket ajak iba yagi sünga kümdagi. Iba yagi karbo tejashi dang bendena alitsüa akok. Anungji temba tinur aser adianutemi metettsü atema sür anogo ishika tsüngda tasüba osang den neburi yariba tepela metetdaktsüba dak alaka, küm shia bilemtetba osangbo magütsü nunga tajungba südisü ta kü tebilemba ka zülur.
Ao oshi renlokyim:
ASLB ajanga asen oshi renloktsü asoshi kanga meranga inyakba ngua kanga pelar. Yangi ni metetba/aginüba kar parnok den yaritepa zülur jungra agitsü, mejungra lokti molungba agiangma.
1. Olasü kasa aser o zülu kasa süaka tzü dena aliba nung Z aser tzü dena maliba nung S ta bendanga amshiba ajanga asen oshi kanga melenshia odagi. Itemji kar yamai :-
a. Asentsü : Mapa inyakdang asentzü (sweat) alur.
: Tanübo ni tsük asentsü ( rice bounding) aika lir.
b. Mamatsü : Ni mamatzü (milk) teti ajemer
: Ibaibo mamatsü (unforgetable) asoshi zülua yuang.
2. Z aser S bendanga mamshiba ojang kar:- tatishitsü agi tsükong yabo olasü nung tzü lir amai adoker. Saka ibaibo ali ongmang/tekong tenem lemsaba (range) dang asünung yangibo tsükong ta dang amshitsüla.
Tatishitsü:-
a) Ongpangkong tsükong
b) Langpangkong tsükong
Karibo tzükong to amshiba angur. Tang nungibo range dak sendakba nungbo tsükong ta dang amshiangma.
3. Ano ojang kar nungbo tzü dena liaka Z ya melena S amshi nung tajungba ta nibo bilemer. Tatishitsü agi tzünglu yabo olasü nung tera tetsükdaktsü adoker. Ni languangetic scholar ka masü, saka nibo tai ajiteter. Tsünglu ta amshi nung tanga ojang kar den olasü ajemer.
Tatishitsü tanga ojang kar :
Tsüng-da
Tsüng-mok
Tsüng-rem
Tsüng-tsüng
Yamaji Tsüng-lu (Tzünglu ta masü). Item ojang ajak ya tetezübo balala, saka o zülu aser olasüji medemmedema adoker. Aji asünung nibo tsünglu ta dang amshitsü ajungshir.