Fungus aser bacteria agi White discharge odaktsür

July 30, 2016 : Tetsür aika white discharge aoba agi kanga timtemer. Parnok tzü aoba tesem nung yeast atemba ajanga white discharge odaktsür.  Ibai fungus aser bacteria tamajung ajanga adokdaktsür. White discharge ya sentsü aika lir-wakong, tanen, tzü sentsü etc. Ano iba den külemi mashisa aliba mapang, diabetes mapang shitak nung anepalu masüba, immune system tashi maitba, shini aketba chiyungtsü onsara achiba, kanga anebelemba, junga amoa oa memejangba aser chiyungtsü shitak machiba ajanga iba timtem adokdaktsür, ta scientist temi ngutetogo.
Parnoki, Vulvovaginitis agi atongdanga white discharge asür, ta nungtetogo. Vulvovaginitis ya tetsür natsü anaba tesem telulen ia meremmerema waklema akümba dang ajar. Kodang tetsür ka dak Vulvovaginitis timtem agi tongdir la tzü aoba tesem nung teti aliba bacteria tajung yimya melenshidaktsür aser ibaji ajanga timtemji angütsür.
Iba timtem ya anogo 3 nungi 14 nü tashi fungus tepsetba cream, ointment, mozü (süngjang) achiba ajanga ajunger. Iba timtem atema Gynazle, Lotrimin, Monistat, Diflucan aser Terazol mozütem nüngdaker anungji doctor tem tetuyuba shitak agia item mozü achitsüla. Iba timtem agi tonger aliba mapang longpant, pantyhose mesüra leggings kanga kangdaka (tight) masemtsüla. Tampons mesüra pads khen mamshii alitsüla.
Ano Vulvovaginitis ya yeast, viruses, parasites, tzü mopung aser shi nung medemdang menatepba tashidak ajanga adokdaktsür aser ibaji ajanga white discharge asür. Anungji ibaji anepalutsü atema antibiotics achitsüla. Allergy asünungbo antihistamines achitsüla. Iba den külemi estrogen cream anütsüla aser fungas tepsetba mozü süngjang achi nung ajungtsü. Kasa timtem atema tekep nung antibiotic,  antibacterial aser antifungal cream tem nülokba ajanga iba timtem ajungtsü, ta bushisüngdangertemi ashi.
Anungji kodang tetsürtem natsü anaba tesem nungi memetetba tzü alua iba tesem anaknüa, mesepa aser aronger ama südir karakara doctor bushitsü nüngdak, ta parnok ashi.