Fury FC-i Summer Challenger Cup 2018 kokogo

Medziphema, Luroi/Aug 3 (TYO): Medziphema jila local ground nung Catalyst for Change (C4C) puri ayongzükba Summer Challenger Cup 2018 tatembangbuba sentong nung tanü o jembidang Nagaland Football Coaches Association (NFCA) tir aser Naga international footballer, Roko Angami-i ashiba agi, NFCA puri arishi küm 7 nungi 13 tsüngda aliba asayartem atema angati agi football coaching camps ayongzüka katsütsü bendanga agüja inyakdar.
Roko-i, NFCA kübok football coache 60 dak tema lir aser football club aser lokti tejangrartemi pei district nung camp tem akatsü asoshi NFCA den tongteprateptettsü, ta ashi. O jembiba mapang pa lanuwa Medziphema local ground nung asayaba bilemteta jembi aser iba nungi international jenjang nung asayaa otetba ya coach tem, külem medemer aser tsürapurtemi sarasadem aser lenla ajak nung nungita yariba ajanga, ta ashi.
Saisapong densema lenla ajak nung takok angutsü asoshi lenmang temelaba kecha mali, ta shia pai asayartem dang VIP recommendations dak metaloker malitsü asoshi ajungshi. Paisa recommendation tulutibaji yimtsüyimbu temoatsü lir, ta ashi.
Maneni Roko-i, asyartem dang professional asayar ka akümtsü asoshi peisasa azüoka meranga inyaktsü asoshi ajungshi. Ajisüaka pai ashiba agi, Naga nunger asayartemi ako yonga mako yonga chiajema benjungtepba ajanga parnok indang career raksar.
Paisa asayartem dang asüküm yimya toktsür ajemalua aliba den tsürapur aser teti teyi nunger akhümtsübutsü aser team coach tem lenisüba kübok anidaktsü mepeshi.
Kasa mapang nung Rogo-i Medziphema aser state nung football ajungkettsü asoshi takok tashi teyari agütsütsü nangzük.
Roko den külemi NFCA general secretary Ayeto Ayemi aser NAYO joint secretary Atseizo Sorü nungeri takokernem sempet agüja liasü.
Summer Challenger Cup 2018 final asaya nung Fury FC puri Matador FC madak 4-1 agi takok ngua takok marok ajungketogo.
Asayamung akokernem senpet sen 50,000 den trophy agütsü aser tanabuba jenjang nung tembangernem senpet sen 30,000 den kuli kaket agütsüogo.
Jurila sempet angurtem rongnung: Best Goalkeeper- United Falcon FC nungi Dziesengulie, Highest Scorers – Matador FC nungi Khriese Terhüja aser Ngalwa FC nungi Nachanso na nem agütsü. Tenapronglai goal pongungu agütsü. Iba sülen Player of the Tournament – Fury FC nungi Haotinlen Thomson nem agütsü. Parnok ajaknem senpet den kuli kaket agütsüogo.