Fusion SC-i 4-1 agi Arrjusanger FC koka semi-final tongogo

October 20, 2015: Imkongmeren Sports Complex nung Fusion SC aser Arrjusanger FC na quarter-final tasembuba asayaba noksa nung angur. (Noksa tangoker-Temjenlemba Longchar)

Mokokchung, October 20 (TYO): Imkongmeren Sports Complex nung tang tasadak XXI MDFA Trophy 2015 nung taoba küm takok ngua aliba telok, Fusion Sporting Club-i tanü, Mongolbar nü 4-1 agi Arrjusanger Football Club madak takok angu aser iba asaya nung match patron ji Medical Superintendent, IMDH, Dr Medem liasü.

State nüburtemi jangja meteta aliba Fusion SC nungi asayar tajungtem, tan tembangba NSF Martyrs Trophy nung asayar arua telok nung densemba ajanga parnok tali tashi itshiogo.

Asaya tenzüker minute pongu tsüngta nung Fusion teloki Arrjusanger defender tem ajanga ball bener lua goal yoktsü merang ajisüaka Arrjusanger asayartemi kanga junga nokdanga D-box alema metsükettsü saka striker, Khekrietsira-i (jersey no 18) D-box tema nung jagi ball ji tanaben kanga tashi ita metsüokja Fusion telok asoshi mezüng goal yok.

Ano minute 18 buba nung Arrjusanger goalkeeper-i matokba ball ka Khekrietsira-isa goal nung metsüokja Fusion SC atema tanabuba goal yok.

Goal ana yok tashi nung Arrjusanger teloki kanga meranga asayatsü tenzük aser aiben goal yoktsü merangdanger tesüsa mezüng asaya tesadang atemtsü minute talila apuloktsüba mapang nung Fusion goalkeeper-i matokba ball ka Arrjusanger striker Nokcha-i (jersey number 9) goal nung metsüokja 2-1 aküm.

Asaya tanabuba tesadang nunga Arrjusanger-i goal kasa akümtsü asoshi kanga meranga asayameso ajisüaka Fusion defender tashi aitba ajanga goal yoktsü maongka mongutet. Yamaji toktepa asayaba mapang minute 52 buba nung Fusion striker Nzauhut (jersey no 9) D-box telung nung ball bener lia alangdaktsüba ajanga Fusion telok penalty metsütsü maongka angu. Iba penalty Khekrietsira-i metsüa Fusion asoshi goal tasembuba yokba ajanga pai hat trick yanglu.

Arrjusanger-i tezüdanga mebilemi maneni meranga asaya saka goal yoktsü maongka monguteti aliba mapang minute 69 buba nung Fusion midfielder Kilang (jersey no 15)-i Arrjusanger defense paitoka ball ka bener lua par telok asoshi goal pezü buba yoka Fusion SC-i 4-1 agi Arrjusanger FC akok. Tanü takok anguba ajanga October 23 nü Fusion SC telok semi-final asayatsü maongka ngutetogo.

Quarterfinal pezübubaji Bodhbar (October 21) nü Shooting Starz FC Vs Dilong YA na tsüngda asayatsü.