Fusion SC MDFA Trophy 2016 semi tongogo

Mokokchung kübok Imkongmeren Sports Complex nung tasayadak MDFA Trophy 2016 asayamong tatembangba quarterfinal asaya nung Fusion SC goalkeeper, Limatoshi-i Telongjem FC asayartemi metsüoktsütsü renemba ball aputsü renemshia ataba noksa nung angur. (Mokokchung, October 19)

Mokokchung, October 19 (TYO): Defending champions, Fusion Sporting Club teloki goal 2-0 agi Telongjem Football Club telok madak tatembangba quarterfinal asaya koka, tang tasayadak MDFA Trophy 2016 asayamong semifinal asayatsü jenjang tanü, Bodbar nü ajangzükogo.
Tanü asaya nung Fusion aser Telongjem telok naprongi kanga meranga asaya aser goal agütsütsü maoangka aiben angu saka par telok anapronglai goal 1 danga takok ngua magütsütetba yong par asaya mezüngbuba shilem tembang tashi nung telok anapronglai goal 0-0 draw jenjang ngua liasü.
Tanabuba asaya shilem nung Fusion teloki tajungba asayatsü tenzüka, goal agütütsü maongka timba angutsü tenzük aser par asayar, Nyithang-i asaya tenzüker minute 70 buba nung goal takok ngua agüja, par Fusion telok temaba jenjang nung ajungkettsü.
Mezüngbuba goal-ji agütsür minute 11 shi süir, asaya tenzüker minute 81 buba nung Nyithang-isa 2 buba aser takokba goal agüja, par telok nem takok ngudaktsü.
Tanü asaya tembangba jakdang asaya reprangertemi makmakshimak adokdakja, asaya minute 20 shi masayatettsüa aküm saka police aser MDFA ketdangsertemi tensaji azüoka asaya sünepa tembangtet.
Fusion teloki tan takok anguba sülen Shitilong SA telok den semifinal asayatsü lemzükogo.