G-20 senden mapang US Tir Trump-i PM Modi ajurutsü

New Delhi, June 25 (Agencies): Tan hopta Japan nung G-20 senden aliba mapang nung US Tir, Donald Trump-i Ato kilonser, Narendra Modi densema lenir balala den jurila senden amentsü.
June 27 nü Trump Japan-i apusoa aotsü aser June 28-29 anogotem nung Osaka nung ayongzükba G-20 lenirtem senden nung adentsü.
Osangbenertem senden ka nung US ketdangser kati, “Pai alima nung lenir balala den senden amentsü onoki imlar,” ta metetdaktsü.
G-20 senden aliba mapang nung jurila senden balala nung Trump-i Australia Ato kilonser, Scott Morrison, Japan Ato kilonser Shinzo Abe, India Ato kilonser, Narendra Modi, Germany Chancellor, Angela Merkel, Russia Tir, Vladimir Putin, Saudi Crown Prince Mohammad bin Salman, China Tir, Xi Jinping aser Turkey Tir, Recep Tayyip Erdogan nunger densema lenir aika ajurua jembitsü, ta ketdangserisa metetdaktsü.
Ato kilonser, Modi-i tang agi kümsük tanabuba election nung takok anguba sülenbo tang mezüng Trump tena senden amentsü. Lok Sabha election nung takok anguba sülen Trump-i phone ajanga Modi nem tenüngsang agüja liasü.
G-20 senden nung alima linük balala nungi lenirtemi rongsenkettsüng, shishilembaba, energy, innovation, workforce development, quality infrastructure aser rongsenkettsüng nung tetsürtem nem tashi agütsüba onüktem densema jembitsü.
2008 küm lenirtem senden ka nung alima rongsenkettsüng timtem anema raratsü atema taoba mapang US Tir, George W Bush-i leniba nung inyak, anungji taruba senden nung rongsenkettsüng tsütsü tayongzükba onüktem nung mapang agia o lemteptsü, ta ketdangserisa metetdaktsü.
G-20 senden nungsa Ato kilonser, Modi-ia Japan Ato kilonser, Shinzo Abe, Russia Tir, Vladimir Putin, China Tir, Xi Jinping aser US Tir, Donald Trump den jurila senden amentsü.