G20-i steel khuret bentettsü ayongzüker: Merkel

Berlin, November 26 (Agencies): Group of 20 (G20) ta ajaba alima ajunga nung rongsenren terenlok tajungtiba aliba linüktemi alimai tang ajurua aliba steel khuret bentettsü lenmang bushitsü tayongzükba olen ka Germany Chancellor, Angela Merkel-i tanü, Honibar nü sangoktsüogo.
“Alima linük kar nung steel nungdakba dang nungi kanga agi timba yangluba ajanga alima tesem aika nung nüburtemi mapa inyaktsü maongka monguteti kümogo,” ta lai ashi.
“Ozü Germany linüki G20 Tir menden taruba December ita nungi tenzüka abentsü temeten ngua lir aser G20 lenisütsü menden benokba sülen alima ajunga nung steel nungdakba dang nungi kanga agi timba yangluba ajanga joko küm aika steel jenjang ajemba akümba aser China aser tongti steel yanglur linüktem na tsüngda adokba mangatettep ken o ajunga ka küma lungjemer bentettsü atema G20 linük ajunga ayongtsü sentong lir,” ta Merkel-i lar alizüng metetdaktsü.
Alima nung China linüki steel timtiba yanglutsü tenzüka lir aser par linüki bendanglen tentetba shishilembadak steel jenjang tajemba agi ayokba ken o nung ajemdaker, Europe aser US lenirtemi steel tali yangluba maparen ajemtsü asoshi China ajungshitsü tenzüka lir.
“China nung tesüsa amenba G20 senden nung par linüki steel nungdakba dang nungi kanga agi timba yangluba onük benoka olemtepogo. Par linüki steel tali yangluba ajanga steel industry nung mapa inyakertemi mapa meinyaktettsüsa tia ajurutsü tenzüka lir,” ta Merkel-i osang jangjashitsü.
“Asenoki ka küma lungjemer steel den sentakba khuret ya aroki bentettsü nungdaker aser iba ajanga linük kati linük tanga ka nem takoksa tia bener marutsütsü,” ta ashi.
China-ia taküm 2016 küm steel ton million 45 agi tajemba yanglutsü nangzüka liasü saka taküm August ita tashi nung par linüki iba alizüngji asangsang nung matalokdaktsüteti aliba osang angazükogo.
Alima nung steel tali yangluba ajanga Britain linük kisüng nung steel industry nung inyaker nisung 5,000 shi mapa meli akümba osang bushiteta lir.
Ano külen, alima nung steel nungdakba dang nungi kanga agi timba yanlguba den sentakba khuret bentettsü atema G20 lenirtemi China nung taküm September ita nangzüktepba osanga jangjaogo.