Gadget-lar akümba ajanga tila tanurtem temang mejungi kümdaktsür

New Delhi, December 19 (Agencies): Technology kangasa kara ainba ajanga tila tanurtem gadget-lar küma parnok temang tia mejungi akümba osang bushitetogo.
Tablet, mobile phone aser game talitapong amshir tila tanurtem teberem agi ashiba, tenük timtem adokba aser iba amala temang nung timtem jenti benoka mozükidangi taneptsü bushia aoba osang doctor-temia metetdaktsüogo.
“Tanü putu nung tablet, mobile phone aser iba amala osettsüset talitapong amshiba ajanga tila tanurtem rong nung tekong aser tapubangi ashiba, tetsüng teben awakba aser süngjema meliteti akümba timtem ajurutsü tenzüka lir,” ta Mumbai nung tentetba Noor Hospital kübok Physiotherapy & Pain Management Department lenisang, Dr. Sadiya Vanjara-i ashi.
Paisa ashiba agi, tila tanurtemi anogo nung ghonda 6 shi tesem ka nung mener technology osettsüset balala amshiba ajanga parnok temang tia mejungi akümba den külemi, parnoki kimalen kazüa sentsütsü mejangrari küma pei temang tia mejungi kümdaktsür.
Tanü putu nung technology osettsüset talitapong amshiba ajanga tila tanurtem temang chizüka oludaktsüba; kechisarena inyaktsü aser senzüsenpongtsü mejangrai kümdaktsüba; tenük mejungi kümdaktsüba; tekong, tapubang aser teberem tashi meiti kümdaktsüba aser mapang peria agia mejangba timtemtem bener aruja parnok temang tia mejungi kümdaktsüba kuli bushiteta lir.