Gaidinliu-i Naga nunger anema noktak aser arasenba mapa inyak: CNSA

Dimapur, August 28 (TYO) : Arogotem aser lokti tentet balalai Nagaland nung lisopurtem tenüng aser akhüm kümzüka ayutsü atema telemtetba agiba Central Nagaland Students’ Association (CNSA)-i pela agizüker aser pusema nungiter ta CNSA sangdong ka nung metetdaktsü.
Gaidinliu ya Naga nunger nüjiso bushiba mapa anema noktaker ka aser arasentsür ka liasü. Nagaland state tentettsü atema inyakba mapa nung lai shilem tila ka danga agiba zülua mali. Lai tila tanurtem taküm tenla agüja arasenba mapa inyakba atema British sorkari la pur tepuokdak ayu, ta CNSA tir, Charles Lotha aser tongti tezülur, Yimlanger Jamir nati külem sangdong nung shia lir.
TR. Zeliang lenisüba kübok sorkari nübortem temulung yirutsüa Gaidinliu tushiba inyakyim nung parnok medentsü atema onük kecha mali, kechiyong parnoki Nagaland nung lennirtem bendanga amshiogo, ta CNSA-i metetdaktsü.
Nagaland asoshi taküm bendanga agüja mapa inyakba lennirtem tushia akhümtsübutsü melena state sorkari nübortem anema Gaidinliu nem tetushi agüja mapa inyaker, saka iba mapa ya tangatetba shitak aliba Nagaland senso shingai magizüktsü aser state sorkari nübortem matsüngdang langzütsüsa akümtsü, ta CNSA-isa sangdong nung shia lir.
State sorkari lisopurtem mezüngmeshia asen Naga nunger lokti atema shilem magir nisung ka nem tetushi agütsüba aser kürakyanglu yanglua külemtsü atema mapa inyakba anentsüla aser iba dak sendakba nung timtem kar ajurura iba tebilemtsü khuretji state sorkari abentsü, ta CNSA-isa metetdaktsü.