Gaidinliu Memorial Hall yanglutsü memelar

Kohima, August 24 (TYO) :  Taküm küm ya Zeliangtsür Rani Gaidinliu sor küm 100 ajungba küm lir aser iba tenüng nung Nagaland state sorkari  Kohima nung Nagaland Secretariat Complex anasa Gaidinliu Memorial Hall ka yanglutsü mapa tenzüka alibaji anentsüla, kechiyong iba mapaji la dak malangba mapa ka lir ta Angami Youth Organization (AYO) teloki Nagaland angh dangi züluba shidi ka nung metetdaktsüogo.

“Onoki lokti rongrong adokdaktsütsü mesüra kar mezüngoki luja inyaktsü tebilemba nung masü saka tetsür shiba tenüng nung iba mapa inyaker, la mapa agi iba amaji Angami nunger lushi nung yanglutsü malang, kechiyong lai Naga nunger aser talisa Angami nunger atema kecha inyaka mali, anungji Nagaland sorkari la tenüngsanga inyakba mapaji tamashi mapa ka lir, anungji iba ama mapaji onoki akok tashi nokdangtsü,” ta AYO-isa metetdaktsü.

Angami nungertem ya Naga nunger yimten nüjiso asoshi nokdaker samanirtem lir, saka Gaidinliu yabo Naga yimten nüjiso anemertem rongnung ka lir, iba ama nisung ka tushia ayutsübaji ozü lima nung onoki kodanga memelatsü ta AYO-isa metetdaktsü.

Iba ama mapa yabo sorkari masü saka mulungtet telok kati la alidak aser lar state Manipur nung inyaktsüsa sentong yanglu nung jungla ta parnokisa ashi.

Kasa maparen nung Federal Government of Nagaland (FGN), Sumi Region nungi sangdong ka nung Gaidinliu-ji Naga nunger yimten lenira masü aser tamangba yimsü lenira masü saka Naga nunger yimten nüjiso atema nokdakba mapa anemer ka liasü ta metetdaktsü.

Laji Hindu yimsü mesükba “Heraka’ yimsü ngutetla liasü. Iba jagi la Hindu nunger tongtibang mongdang nung dena jaja aser Hindu nunger lokti tentet VHP amala den atongsema inyaka aru. Laji India asoshi Naga nunger anema nokdaker ka liasü, anungji la tushia Kohima nung kecha yanglutsü menüngdaker ta FGN Sumi Region-isa metetdaktsü.