Gaikwad-i tayimtsü company tem anema ken o benoktsü

Mumbai, March 26 (Agencies) : Shiv Sena MP, Ravindra Gaikwad-i Delhi nung Air India mapa inyaker ka merenshia teka sangshiba sülen pa tayimtsü company temi nokdang aser ibaji ajanga pa train ajanga Mumbai-i aru.
Ajisüaka, tanü pai tayimtsü company anema ken o benoktsü ta metetdaktsüogo.
Gaikwad-i Air India employee dak pa indang slipper agi 25 ben azük aser tang pai tayimtsü company tem anema ken o benoktsü ta shiogo.
“Kü indang tickets agienba atema ni Indigo aser Air India anema ken o benoktsü” ta pai osangbener dang ashi.
Shiv Sena-i pa masemer saka Air India-i telemtetba agiba atema parnoki ashishiteper.
Shiv Sena lennir Sanjay Raut-i, “public-i Air India nung mesenzütsü telemtetba agira, parnok kechi tia ajurutsü?” ta asüngdangogo.
Gaikwad-i Sukumar dak azükba nokdangtsü merangba air-hostess-i tanü lai Gaikwad metsübur ta metetdaktsüogo.
“Gaikwad-i kü den jungjunga jembi. Pai Sukumar dak azükba aser nungtoktsü merangba ni nokdang. Gaikwad-i Sukumar nungzüka yoktsü merang asü masü’ar ni meshiteter” ta lai osangbener dang ashi.
Taoba Brihotisbarnü Gaikwad-i arishi küm 60 tain Air India duty manager ka dak teka sangshiba video nung menüngoka lir. Pune-Delhi tayimtsü nung pa business class nung maniokba atema Gaikwad-i duty manager dak azük.
Duty Manager Sukumar Raman-i pa dang tatok meshitsüla, ta iba tatalokba sülen Gaikwad-i takhangba agütsü.