Galant-i Belgium Transport Minister menden toktsür

Brussels, April 15 (Agencies): Belgium Transport Minister, Jacqueline Galant-i yimsüsütsü menden tanü, Hokolbar nü toktsüogo.
Islamic State (IS) kiralongrar teloki Belgium yimtiba, Brussels nung bomb lendong 3 tashi taoba March ita atalokdaktsüba jakdang European Union (EU)-i Brussels Airport nung lendong atalokdaktsütsü sentong renemba osang mapang jilia metetdaktsüba den sentakba nung lai teinyaktsü meinyak ta shia, Belgium opposition teloki la aitsüba sülen Galant-i Transport Minister menden nungi anener lir.
EU-i Brussels tayimtsü anendak lendong atalokdaktsütsü sentong renemba osang lar office-i meteta mali ta Galant-i taoba mapang parliament nung metetdaktsü saka EU-i lendong ataloktsü osangji yaküm, 2015 küm March ita metetdaktsü aser iba osang indang email kuli lir ta opposition teloki metetdaktsüogo.
Ajisüaka, Brussels tayimtsü anendak lendong atalokdaktsütsü sentong renemba osang mapang jilia metetdaktsüba den sentakba osang lemsateptsü asoshi European Commission ketdangsertemi memulungi aliba osanga jangjaogo.
“Brussels tayimtsü anendak lendong atalokdaktsütsü sentong renemba osang parliament nung memetetdaktsüba ajanga Galant-i kanga mejungi aibelenogo,” ta Galant-i benokba minister menden nungi anentsü shiti agizükba sülen Belgium Ato Kilonser, Charles Michel-ia tanü sangoktsü.