Galaxy Note Fan Edition July 7 nungi ayoktsü

July 4, 2017 (Agencies): Samsung Electronics-i Deobarnü Galaxy Note 7 smartphone yangushir adokba iba hopta nungi tenzüka ayoktsü ta sangdongogo. Galaxy Note 7 smartphone battery tem apokba ajanga iba phone yaküm company ajanga meyipa agiadok, koba ajanga parnok sen billion aika takoksa alu aser alima tsüngdang tenüng menüka liasü. Note 7 yanglushir adokba phone ya phone meyiba meshibatem, Note 7 handset melapoki aliba tasentem aser component mamshi aliba tem amshia yanglur battery tasen inoker ayoktsü, ta Samsung ajanga sangdong.
Limited-edition phone – Galaxy Note Fan Edition (FE) ya South Korea nung July 7 nungi ayok tenzüktsü aser Korea nung iba phone 400,000 dang ayoktsü, ta company ajanga metetdaktsü. Parnokisa ashiba agi iba Fan Edition phone ya bendanglen sayatsü mesayatsüar mapang tatsüka lir ang telemtetba agitsü. Iba phone ya Won 699,000($611) agi ayoktsü koba taoba phone dang nung kanga agi tajemba lir. Galaxy Note 7 ya $1,000 agi yoka liasü.
Yaküm Galaxy Note 7 handset million asem shi meyipa meshia liasü saka Greenpeace densema lokti balalai iba phone indokba ajanga tzü mepong menentsütsü ta tebilemtsü akaba lemsatepa liasü.
Galaxy Note 7 handset battery nung timtem adoka meyipa meshiba ajanga Samsung pur alima matsüngdang kanga maksüa liasü, saka tawa parnok indang phone tasenba Galaxy S8 sayaogo aser iba phone aikati kanga sapua agizükogo.
April ita Samsung-i küm asem tsüngda nung quarterly net profit timtiba aazükba sangdonga liasü, saka company tanga tsütsü kanga timtem nung lir.
Samsung group’s vice-chairman Lee Jae-Yong sübokrem agütsüba dak sendakba nung tanga pa anema ken o benoka lir. Iba ochi mashi maparen ajanga taoba Korea tir Park Geun-Hye mapa nungi anentsüa liasü.
Lee ya Park aser la confidante Choi Soon-Sil na nem sen million aika sübokrem agütsüba atema aija lir.