‘Game of Thrones’-i Jon Snow tanaben shia arudaktsütsü akok

Los Angeles, November 24 (Agencies): Home Box Office (HBO)-i ketdangsüa yangluba ‘Game of Thrones’ otsü nung tongti shilem agir, Jon Snow tanaben shia arua iba otsü nung maneni tongti shilem agitsü renemba osang ka angazükogo.
‘Game of Thrones (GOT)’-i tesüsa sayuba ‘Game of Thrones 5’ nung külem medemertemi tsüngsetsang, Jon Snow tejak azü agi mezübangba noksa ka nung ‘April, GoTSeason6’ ozülu zülur tweeter ajanga alima den lemsatepogo.
‘Game of Thrones 6’ taruba 2016 küm April ita nungi tenzüka HBO television channel nung sayutsü renema lir.
Britain nunger actor, Kit Harington-i shilem agisang, Jon Snow tanaben GoT nung tongti shilem agidaktsütsü renemba osang angazükba sülen alima ajunga nung iba otsü reprangertem kanga dang pelatepba osanga angazükogo.
Nungtugu otsükaket zülur, George R.R. Martin-i züluba ‘A Song of Ice & Fire’ otsükakettem nung ajemdaker yangluba GoT television otsüi Emmy sempet agizükba den külemi, iba otsü ya kümshi nisung million 20 dak temai reprangba osang bushiteta lir.
Harington-i asangsang nung pa kou memejeptsü lemtetba den külemi, külem actor-temi osangbener den ajurutepdang miim osang kar lemsatepba ajanga Jon Snow maneni GoT nung tongti shilem agitsü akok ta aikati teimla yua lir.
Ned Stark’er asangchi, Jon Snow-i GoT shilem 5 prongla nung shilem agiba sülen tatembangba GoT otsü nung pa Night’s Watch nung Commander jenjang angur saka külem medemertemi pa tsüngseta sayua tesüsaba GoT shilem tembanga lir.
Ajisüaka, Jon Snow tanaben shia arudakja nisung ama shilem magidakjaka, pa yimya tanga nung tanaben shia arudakja iba GoT otsü nung maneni tongti shilem agidaktsütsü akok.