Game of Thrones Prequel nung Starks’er kibong adoktsü

Chiteni/July 10, 2019 (Agencies): HBO puri Game of Thrones prequel tang teyangludak lir aser tarutsü nung iba show sayatsü imlaa atar. Osang ajanga ashiba agi, prequel ya Game of Thrones masüdang küm meyirejang aika tejakdang atalokba ama yanglutsü.
Ajaki kanga yongyaa aliba iba spinoff series ya tawa Northern Ireland nung tangok tenzükogo kong Game of Thrones season ajunga tangoka liasü.
Entertainment Weekly-i tawa author George R.R. Martin den sensaksemogo, shiba taruba season atema showrunner Jane Goldman den sendaktepa lir. Pa den taruba series nung imlaa atatsüba shilem tem indang jembia liasü.
Martin-i ashiba agi, Game of Thrones series nung tongi shilem agiba Stark’er kibonga prequel otsü nung inoktsütsü.
“Stark’er kibong iba series nung inoktsütsü. Otsü nung White Walkers tema alitsü aser direwolves o mammoths nunger amala iba otsü nung inoksemtsü,” ta pai ashi.
Paisa “Lannisters tem ano otsü nung inoka mali saka Casterly Rock bo lir,” ta Martin-i ashi.
Author-isa, iba mapang nung Westeros jenjang indang kar lemsatepa liasü.
“Onoki Westeros nung chuba yimli tenet indang ashitsü; kong Aegon-i chubayimli atsüngba mapang chubayimli tenet liasü. Ajisüaka ano iba dang nungi tera tesüleni lura chuba yimli teku, chuba yimli 12 aser chuba yimli noklang aika aser yimli tilala aika alitsü aser iba mapang indang onoki jembir,” ta paisa ashi.
Martin-i Entertainment Weekly dang ashiba agi, Game of Thrones nung Westeros ama masü saka prequel nung Westeros ya khen yongi tesem balaka asütsü.
“Prequel nung King’s Landing, Iron Throne Targaryens nunger mali aser Valyria ano parnok indang dragon den tashi inta mekümi alir. Onoki alima balaka indang sayutsü merangdar aser iba series nung jangdatemtsü shilemji iba ya ka asütsü,” ta pai shisem.
Iba Prequel series nung Naomi Ackie aser Denise Gough den Naomi Watts-ia shilem agitsü. Maneni show nung Miranda Richardson, Josh Whitehouse, Jamie Campbell Bower, Sheila Atim, Ivanno Jeremiah, Alex Sharp aser Toby Regbo nungeria tongti shilem agitsü.
HBO-i tang tashi iba series indang nüngja mesangdong saka Martin-i taoba küm ashiba agi series tenüng ya “The Long Night” ta ajatsü koba GoT final season tasembuba episode nüngja liasü.