Gandhi Ashram lapoksang Natwar Thakkar süogo

Guwahati, Mongputeni (October) 7 (Agencies): Nagaland nung ajaki akhümtsübua aliba social activist aser Gandhian Natwar Thakkar tanep Guwahati nung süogo.
Deobar anepdang 7:10 ako meta Apollo Hospital nung Thakkar alima nungi pilaa ao. Pa arishi küm 86 liasü.
Thakkar dang Natwar bhai ta kanga sapua aja aser pa temang mejungi akümba atema September 19 nü Guwahati-i anir aru aser Apollo Hospital indang intensive care unit (ICU) nung anepalua liasü.
Tetenzük nungbo pa temang tajungba küma shia arur ama liasü saka Honibarnep pa temang tamajungba aküm.
Gandhian asür Natwar Thakkar-i pa kinungtsü Lentina Ao Thakkar den jabaso ka aser jala ana toktsür ao. Pa kinungtsü Lentina ya Padma Shri award angur ka lir.
Pa mangji Nagaland kübok Chuchuyimlang-i bener aotsü ta kinungertemi ashi.
Padma Shri award angur asür Thakkar ya Maharashtra nungi liasü aser 1955 küm pa arishi küm 32 asüdang Nagaland nung social work inyaktsü atema ao. Pai Mokokchung district kübok Chuchuyimlang yimtsüng nung Nagaland Gandhi Ashram lapok.
Pa sapurtemi Thakkar dang ‘Gandhi of Nagaland’ ta aja kechiyong pai Nagaland nung kanga dang meranga Gandhian tangatetba aser tesayubatem prokshi.
Linük aser tangalen nungi nisungtem Chuchuyimlang nung pai lapokba küm 62 tain ashram semdangi aoer.
Thakkar-i Kaka Kalelkar, Jayaprakash Narayan, Verrier Elwin, Jawaharlal Nehru, Indira Gandhi, Morarji Desai aser Manmohan Singh nunger den tesentaktep tajung liasü.
Nagaland Chief Minister Neiphiu Rio-ia Twitter nung Natwar Thakkar asüba atema mangyimba metetdaktsü.
“Nagaland Gandhi Ashram lapoksang Padma Shree Natwar Thakkar asüba osang angashia temulung raksar. Pai loktiliba tajungba kümdaktsütsü atema mapa aika inyaktsüogo. Tsüngremi par kibong, medemertem aser temeimer nem tashi agüjang aser pa tanüla teti atema anisüngzük ngudakjangma” ta Rio-i ashi.