Gandhi asoba anogomong nüngtem nung Gandhi Peace Exam agitsü

New Delhi, Rongjui/September 29 (Agencies): Mahatma Gandhi asoba anogomong atongtsü lia Amongnü (Rongjui/September 30) tepoukdak alir nisung 600 aser college azünger kaketshir 700-i Gandhi Peace Exam agutsütsü.
Iba tatidang nung Mahatma Gandhi taküm otsü aser pa tangatetbatem dak sendakba tasüngdangbatem asüngdangtsü. Iba tatidang ya küm shia Sarvodaya Mandal-i ayongzüka agir.
Gandhi asoba anogomong- Mongputeni/October 2 anogo ya alima tesem ajaklen International Non-violence Day amonger.
Nagpur Central Jail aser Washim Central Jail nung puoka alirtem aser Washim Jail nung ketdangsertemia Mongputeni/October 2 nü iba tatidang agutsütsü, ta Mumbai Sarvodaya Mandal nungi TRK Somaiya-i metetdaktsü.
Dhule, Chandrapur, Alibaug aser Akola district tem nung aliba jail balala nung tepoukdak alir nisung 270-i iba tatidang agutsüogo.
Yamaji asüng (Amongnü) Thane nung aliba Rustomjee College aser Mumbai nung aliba K J Somaiya College aser Bhausaheb Hiray College nung azünger kaketshir 700-i iba tatidang agutsütsü.
Somaiya-isa, Mongputeni/October 2, 2018 anogo nungi tenzüka Mongputeni 11, 2018 nü tashi Gandhi Book Centre, Mumbai nung Gandhi indang kakettem jenjang shilem 50 ajemer ayoktsü, ta metetdaktsü.