Panaji, January 29 (Agencies): Linük tebu Mahatma Gandhi asüba anogo, January 30 nü Gandhi tepsetsang, Nathuram Godse indang kaket ka sayatsü aliba sentong tang tasen tentetba party, Goa Forward-i anemogo.
‘Nathuram Godse -The Story of an Assassin’ kaket ya Anup Ashok Sardesai-i zülu aser iba kaket ya asüng (Honibar) Margaao nung aliba sorkar indang Ravindra Bhavan nung BJP lenir aser Bhavan chairman Damodar Naik-i sayatsütsü sentong lir.
“Linük anemba indang ka atema sorkar meyong ki mamshitsüla. Iba sentong akatsü atema sorkari temelaba agütsü nungbo onoki Ravindra Bhavan kima lungkak aittsü,” ta Hokolbarnü Goa Forward secretary, Mohandas Lolienkar-i ashi.
Paisa, parnoki lungkak aittsü ayongbaji Independent MLA Vijai Sardesai densema aikati pusemer, ta ashi.
“Nisung shinga iba sentong nung medentettsü atema Party nung inyakertemi iba tesem kishi ajaklen nokdangtsü,” ta paisa ashi.
Party-i South Goa district collector dang iba sentong thinentsütsü atema mepishiba shidi ka agütsüogo.
“Iba ya Mahatma Gandhi asüba anogo January 30 nü ayongba lir,” ta Fatorda nungi MLS Vijai Sardesai-i ashi.
Ajisüaka Ravindra Bhavan ketdangsertemibo, parnoki iba sentong ya methinentsütettsü, ta shiogo.
“Ravindra Bhavan kiji tim inyakyim ajanga mekazüka ayu,” ta Bhavan chairman Damodar Naik-i ashi.
You must be logged in to post a comment Login