Gandhi asüba anogo nung RSS-i nanglong lemtsü: Congress

Bengaluru, August 27 (Agencies): Congress tatong Tir, Rahul Gandhi-i, Mahatma Gandhi tepsetba nung RSS tenteti shilem agia lir, ta aitsüba atema Rashtriya Swayamsewak Sangh (RSS)-i maneni Rahul aitsüba mapang ka nung tanü Congress Party-i, Mahatma indang yimjung aser tesünep tangatetba anema RSS-i nokdakbaji meteta dang lir, ta aitsü.
Honibarnü osangbenertem den jembidang Congress lenir, Rizwan Arshad-i, party-i RSS aser parnok tangatetbatem anema raratsü, kechiyong iba tentet ya parnok ajunga asa-a inyakba tentet ka lir, ta ashi.
“Mahatma Gandhi asüba anogo nung RSS-i nanglong lemtsübaji meteta dang lir. Nathuram Godse ji (Gandhi tepsetsang) RSS züngsem ka liasü, aser parnok Gandhi dang mepelai liasü, kechiyong pai iba linük ya telongjem nung lidaktsünü aser tamangba yimsü ajak tsüngda tesünep lidaktsünü,” ta Arshad-i ashi.
“RSS-i azü tokshiba aginü aser parnok tangatetba ajanga Mahatma Gandhi tepset,” ta Congress lenirisa ashi.
Ano külen Bengaluru nung osangbenertem den jembidang Bharatiya Janata Party (BJP) lenir, Sudesh Verma-i, “Rahul Gandhi indang o entepbaji tatembang ka dangi arura, iba linük nung Sikh nunger jenti tepsetbaji Congress ajanga lir ta onoki jembitsü akok asü (?) 1984 küm Sikh nunger jenti tepsetba nung Congress lenirtem densema aliba onoki meteta lir. Ajisüaka ibaji Congress tai ajanga lir aser Congress indang asalendong shilem ka lir ta jembira, Rahul Gandhi-i ibaji agizüktettsü asü (?)” ta asüngdang.
Yashi Congress lenir, Rahul-i, pai RSS indang jembiba o nungi masetshir aser RSS indang telemsa adokdaktsüba onüktem anema raraba manentsü, ta jembia liasü.
Bodhbarnü Rahul Gandhi atema okatsür, Kapil Sibal-i Supreme Court dang, Gandhi tepsetba atema Rahul-i RSS ji tentet ka amai maitsü saka iba tentet nung densema alir nisungtem aitsü, ta shia liasü.