Gandhi-i agiba Champaran Satyagraha küm 100 ajunger

Motihari, April 15 (Agencies): Mahatma Gandhi-i Champaran Satyagraha agiba sülen küm 100 ajungba bilemteta tanü Bihar nung sentong ka agiogo.
British nunger yimsüsüba mapang aluyimertem nem tashiyim agi indigo yimdaktsüba anema Mahatma Gandhi-i Champaran Satyagraha ayonga agi.
Tanü iba sentong bilemteta nisung kati Gandhi ama sübor train ka nung Bapu Dham station-i aru aser idakji Union Minister aser local MP Radha Mohan Singh aser Tara Gandhi (Mahatma Gandhi’er semchir) nati pa pela agizük.
Iba mapang Bapu Dham station nung tanurtem aikati linük wako bener aden aser Gandhi ama sübor aruba nisung train nungi ayazüka aludang “Bharat Mata Ki Jai” aser “Champaran Satyagraha Zindabad” ta yimyimtem ayim.
1917 nung atalokba ama iba kasa train ji April 22 nü Bettiah-i apusoa aotsü, ta Motihari station nung Assistant Station Master Khursheed Iqbal-i osangbener dang ashi.
Champaran Satyagraha küm noklangjungmung tenüng nung tayongertemi iba ya jilushi ka ama renemer sayur. Mahatma Gandhi-i British nunger yimsüsür anema mezüng lungkak aitba sentongji iba ya liasü aser iba tatalokba ta tanü lanurtem aser tanurtem dang angateta sayutsü nükjidong nung Champaran Satyagraha jilushi sayur.