Gandhi-i aluyimer aser tribal nem ali meyipa agütsü

New Delhi, Tsüklai/February 16 (Agencies): Congress tir Rahul Gandhi-i Honibarnü Chhattisgarh nung aluyimertem aser tribal tem nem parnok meyong ali dak sendakba nung kuli kaket meyipa agütsüogo, koba state kübok Bastar district nung Tata Steel factory ka lapoktsü asoshi agir liasü. Gandhi-i ashiba agi, aluyimer aser tribal tem nem ali meyipa agütsüba ya linük nung Chhattisgarh nung tang mezüngbuba inyakogo.
Congress-i Chhattisgarh assembly election matong tsüngda parnok nem vote agütsüra ali meyipa agütsütsü ta nangzüka liasü. Iba ali ya 2008 küm Tata Steel indang factory ka amenoktsü atema agia liasü. Sorkari agiba ali ya yimtsüng 10 kübok aluyimer 1,707 indang ali hectares 1,764.61 liasü.
Brehostibarnü Pulwama nung kiralongrartemi sepaitem amakba sülen tang mezüngbuba Gandhi-i lokti senden ka nung shilem agiogo.
Gandhi-i, tang mapa ya linük asoshi mangyimba mapang ka lir ,ta shia pa indang political rally tem ajak thitsü. Ajisüaka pai iba sentong nung aluyimer aser tribal tem indang ang tali jembia liasü.
Bastar, Gandhi kübok Dhuregaon yimtsüng, Adivais Krishak Adhikar Sammelan nung o jembidang Gandhi-i BJP aija ashiba agi, “taoba BJP sorkari parnok ket nung aluyimertem nem agütsütsü asoshi fair MSPs (minimum support price) mali ta shia liasü. Ajisüaka onoki sorkar kümtetba sülen iba mapa ya inyaktettsü ta sayuogo.”
Aluyimertem dang loan tai adokba dak sendakba nung Gandhi-isa Ato Kilonser aija ashiba agi, “aluyimertemi insurance premium agütsür saka alu nung tsünüsenpongtsü raksaba mapang nung insurance mangur. Item sen ya Anil Ambani nunger amala nisungtem juli-i indang indanga aier. Narendra Modi-i, Anil Ambani, Mehul Choksi aser Nirav Modi nunger loan tai toktetra pai alu indang loan tema tai toktettsü.”
“Demonetisation ya black money anema rara ka süra kechiba ochishiba nisung tem tarensena nokdaktsüsa aküm,” ta Modi-i aniba sorkar aija Gandhi-i ashi.
Congress tir-isa Chhattisgarh nung sorkar tasenba kübok terenlok asoshi project balala sayaa liasü. State nung tribal tem atsüa arutsü nükjidong nung Gandhi-i, arem, ali aser tzü temeden ya tribal tem meyong aser arem nungi tajangzük aluba tem parnok ket atongtsüla ta ashi.