Gandhi-i tetsüng ajemokba tesem ajak semdangogo: PM Modi

Durban, July 09 (Agencies): Honibarnü Ato kilonser, Narendra Modi-i India linük Tebuti, Mahatma Gandhi nem akhüm tulu agüja South Africa nung Gandhi lanur asüdang train nung senzüba bilemteta train nung jajaogo.
1893 küm Mahatma Gandhi sentsü apir pa train ka nungi nungzüka yokba bilemteta tanü nikongdang Modi-i Durban nung Pentrich railway station nungi train nung mener Pietermaritzburg tashi ao.
“South Africa nung lawyer Mohandas Karamchand Gandhi-i semdangba tesem asemprong ni semdangogo. Item tesemtem ajanga pa ‘Mahatma’ ka aküm,” ta Modi-i ashi.
“South Africa semdangba ya ni atema ‘temeshi aini aoba’ mesük. India putiotsü aser Mahatma Gandhi indang tongtibang tesem asemprong ni semdangogo,” ta paisa ashi.
“Mahatma Gandhi aser Nelson Mandela nunger otsütem ajanga tarutsü putu maneni ajungmesotsü. South Africa-i mapang talangka raraogo aser iba rara nungji India-a shilem liasü,” ta paisa shisem.
“Tanübo terenlok atema South Africa aser India na yaritepa inyaker,” ta Ato kilonser, Modi-isa ashi.
Pietermaritzburg atongba sülen Modi-i ‘The Birthplace of Satyagraha’ omen nung exhibiton ka lapoktsü, aser iba sentong nung jembidang pai, “Iba tesem ya  ‘Mohandas’ agi  ‘Mahatma’ melenba tesem lir, ta ashi.
Train station nung tesemdangertem kaket nung Modi-i, “Pietermaritzburg nung tatalokba ajanga India putiotsü melenshi,” ta zülua doktsü.
Gandhi South Africa nung alidang asükwa aonung ka pa Durban nungi Pretoria-i aodang pa train nung first-class takdang nung mena alibaji temesüng nisung kati ashishi aser pa dang third-class takdangi aotsü tuyua liasü.
Gandhi ket nung first-class ticket liasü, anungji pai iba tetuyubaji manga, ibayongji Pietermaritzburg station nung pa train nungi nungzüka yok.
Iba aonungji pa station nung aonung piyong sükseta kazü.