‘Gandhi Jayanti’ anogo nung jail nung alir 452-i tatidang agütsütsü

Mumbai, September 30 (Agencies): Linük tebu, Mahatma Gandhi asoba anogomung October 2 nü Maharashtra nung Taloja, Nagpur aser Aurangabad Jail nung tepouktak alir nisung 452-i Gandhi tesayubatem nung tatidang agütsütsü.

“Mahatma Gandhi-i pa taküm piyong meraratsü asoshi sayua liasü, aser iba ya hadir tajung ka ta pai kuli sayuteta liasü. Pa akümli küm trok ser tesadang ka tepoukdak liasü. Pai iba mapangji pa dak sempet aliba arangshitsü atema amshi,” ta Bombay Sarvodaya Mandal, T K Somaiya-i ashi.

Mandal aser tanga Gandhian institution tem senteper tesüiba küm 10 nungi tenzüka Maharashtra nung aliba jail balala nung Gandhi Peace Examination agir, aser iba ya tepouktak alirtem taküm melenshitsü mapatong rongnung shilem ka lir, ya Somaiya-i sangdong ka ajanga ashi.

“Iba yagi kanga ajungmesor. Iba tatidang ya tepouktak alirtemi sasa bilemtsü aser parnok melungjang nung parnok tsüngda meraratsü aser ochi nung alitsü nükjidong nung agir,” ta paisa shisem.

2005 küm ochimashi ken o aika nung aitsüsang, Laxman Gole-i tangbo Maharashtra nung aliba jail ajak nung tepouktak alirtem dang Gandhi tesayuba nung ajemdaker sayutsüngia senzür.

“Onoki mark 80 indang tatidang agitsü, kong tepouktak alirtemi ‘objective type question’ 80 langzütsü. Iba tatidang nung takok angurtem nem Certificate aser sempet melen Khadi süoshi agütsütsü,” ta Gole-i ashi.