Gandhi Jayanti tenüng nung shisatokden sentong ayongzüka agi

Kohima, October 2 (TYO): Linük tebu Mohandas Karamchand Gandhi asoba anogo tenüng nung Nagaland nunga tanü Gandhi Jayanti ayongzüka amung.
National Students’ Union of India (NSUI) Nagaland State Unit-i Gandhi Jayanti tenüng nung “politics – young voters” onük nung ajemdaker shisatokden sentong ka ayonga agi.
Sentongji Congress Bhavan, Kohima nung ayongzüka agi aser Nagaland Pradesh Congress Committee tir, K Therie-i o jembidang, “Naga nungertemi candidate jak repranga masü saka yimten telok indang election manifesto nung ajemdaker vote agütsütsü mapang tongja tongogo” ta ashi.
“Election temer public indang temetenji yimten party indang manifesto-ji dang asütsü” ta paisa ashi.
Telok bendanga inyaksangshiba aser secularism atsütepba tsüngda Nagaland lir. Tang asen state nung aliba sorkari nübortem yaritsü asoshi mangdang mesüra yimten tangatetba kecha mali, saka parnok sen aser tashi angutsü atema dang mazüngi lir. Nübortemi sorkar ketdangsübaren melenshinür aser taruba election nung Congress-i takok angutsü maongka lir,
Shisatokden sentong nung shisalen sayurji Nagaland University Meriema Campus Pro Vice Chancellor, Prof. RC Gupta liasü.
Pai “Role of youngsters in democracy” onük nung ajemdaker jembidang, “tanur nungi tain akümba tsüngda lanuwa mapang ya ajurur, anungji iba mapang ya kanga dang tongtipang ka lir. Iba mapang lanurtem dang democracy jungjunga metetdaktsütsüla aser iba jagi parnoki telemtetba tajung agia loktiliba, state aser linük tejakleni anir aotsü” ta ashi.
Sentong nung NSUI Nagaland Unit tir, Sentimeren-ia o jembidang, “Election Department Nagaland-i bushitetba osangtem nung ashiba agi Nagaland nung arishi küm 18 nungi 29 tsüngda lanur vote agütsür 2,96,698 lir” ta metetdaktsü.
Maneni, Nagaland nung arishi küm 18 nungi tsüngda vote agütsür tasentem nisung 15,944 lir, ta paisa shisem.
Sentong nungsa NPCC tongti tezülur, Captain G K Zhimomi-i “Embrace and understand social media” onük jembidang, “asen tebilemba aser osangtem prokshitsü atema sabang tajung kaji social media lir” ta ashi.
“Social media nung tenokdangba kecha melii osangtsüsang kanga kara prokshir. Anungji, lanurtemi social media amshitsüla saka osang tejangja ang sangdongtsüla aser mapang timi amshitsüla” ta paisa shisem.
Shisatokden nung Senior Journalist Okenjeet Sandham-i “Moral obligation of young voters” aser NPCC Working President, Ayangba Aonok-i “Remembering Gandhi” onüktem jembi.
Gandhi Jayanti anogomung sentong nung mendenji NSUI Nagaland Unit general secretary, Phillip Kikon liasü, Lotha Baptist Church Associate Pastor, A Libonthung Yanthan-i temoatsü meshia sarasadem, Tosovi-i ken ka aten aser NSUI Nagaland Unit Senior Vice President, Moasenla Jamir-i anküp tepela o jembi.