Gandhi küm 150 ajunger

Mahatma Gandhibo alima nung taküm mali saka maliyonga ali ama, tanü pa sor küm 150 ajungbamong amonger. Pa tenüng shitakbabo Mohandas Karamchand Gandhi, saka pa taküm ya tangar dang nungi balaka ochishia aser meshiteta aliba aser tangar asoshi pei taküm agütsütsüa metsübui temeim aser taremzük agi inyakba nüngtugu nisung asüba agi ‘Mahatma’ naroküm agütsü. Mohandas Karamchand agi Mahatma melentsüsa akümba ya India yimten nüchiso asoshi raraba mapang, linük meimer, ken aser sangro mejemer, Rabindranath Tagore-i pa dangi shidi züludang, Mohandas Karamchand Gandhi dang “Mahatma’ ta shidi nungji amshia zülu. Atangji, Mahatma tetezü Sanskrit oshi nung “tanüla tulu aliba nisung’ ta aküm agüja ajaba naroküm ka lir. Iba tenüngji Mohandas Karamchand Gandhi ama, takar aser yimsüsür kibong nungi adokba aser India nüchiso mangudangyongi London tashi nung oagi kaketshisatsü bushiteta azüngba tashitemetetter nisung süaka, item jenjang tajung ajakji toktsür, coat suit dena semzüka yutsür, pei temanga mayim pei tetsü tasoli nung adokba aser yangluba süoshi, dhoti dang semer, pei nübortem asoshi yimten nüchiso bushiba tongpang nung chia mechiyong nokdakba taküm asoshi tapet aser tetemsü naroküm asütsü. Mahatma Gandhi-i pei lima yimten nüchiso asoshi raradang, injang prangpong mamshi, gari nunga mejaja aser ki tajung bushia oa chiyongtsü tajung shima machi. Pai pie lima yimten nüchiso asoshi raraba hadirji tashiyim agi masü tangatetba agi, anogo shia tekülem kidang oagi sarasademba agi, lumiba agi aser nübortem den külemi tetsüng agi jajaa tangatetba agütsübatem liasü. Tanü asenok mapa aser taküm yimya den Mahatma Gandhi’er kibong, pa taküm aser pa libalirotem medemdangra taaktsüka lir. Pa apibo asenokbo kecha memetetba sensaker kibong nungi aser pa ama nüngtugu kaketreju nung tashitemetet anguba nsiungtem masü, saka tanü asenokbo asen yimten nüchiso indang jembitsü atema hotel tajungtiba bushia chiyongtsü tajungtiba den chiyongtsü renema yur külenang senden amentsü. Asenok pei nübortem nem yimten nüchiso bushitsütsü aser terenlok mapa tapu balala bener arua anepalutsüsa jenjang tilaka nung danga lira, ki tajung nung lia gari tajungtiba amshia inyaktsü merangtsü. Tanü ama Mahatma Gandhi tasoba anogo amongdang pa taküm aser mapa den asenok taküm aser mapatem memdemdanga amongtsü kanga tongtibang lir. Mahatma Gandhii linük nüchiso asoshi raraba dang masü saka linük merüka alitsü asoshi inyakba maparen nunga temelenshi tuluka bener arutsüogo, ibayongji pa asoba anogo October 2 ya linük nung merükmejuba anogo amai amonger. Tang tashia India nung tesem aika nung nisungtemi metsümeshidak balaka meyanglur, anungji aremlen mesüra moapu nung oagi metsümeshir. Iba jagi government-i linük ajaklen kibong shia metsümeshidak yanglutsü ajungshir aser teyaria agütsür. Tanüa iba jenjang nung alir süra, Gandhi nunger mapang nungbo nisungtem alidak tesemtemji komaka tesempatsüka ser asütsü ta yimdangi arua bilemer. Aji oda, Gandhi-i anir yimten nüchiso asoshi dang masü saka nübortem aliba ki aser kima yimdong ajak merüka alitsü asoshi mapa agi sayua ajungshia senzüba otsü lir. Parnoki kenünübo nisungtem aliba ki kilong tashi iagi metsümeshidak oktetja merüktettsüba otsü lir. Atangji, pa Hindu nunger kin tulu nungi, anungji kin tilartem den ajurutepa salemtsü aser janaona amshia ki aoktsüba mapaji parnok asoshi tashibangtsü mapatem liasü aser tanga yamaji parnok rongnung bendanga amshir. Ajisüaka, Gandhi asoshibo kin tulu tila kecha mali, ano pa asoshi Hindu- Muslim kasadang, ano Khristan yimsüsa tajungba ta jembiba nisungji pa liasü. Tanüa India lima nung Hindu nunger Mahatma Gandhi ama ka danga lilasang, India süngjemla aser shinga pei lima nung tamangba yimsü balaka amangba agi pei nisung tsübua melila.