Gandhi, Nehru, Ambedkar aser Azad nunger ajak NRI tem liasü: Rahul Gandhi

New York/New Delhi, September 22 (Agencies): Congress tatong Tir, Rahul Gandhi-i, India nüjiso raraba nung tongtibang lenirtemji “NRIs” (non-resident Indian) tem liasü aser Congress party ya “NRI movement” ajanga tentet, ta ashi.
Brihostibarnü New York nung Congress party pusemer NRI 2000 shi den jembidang Rahul-i, “Congress indang chichiba movement ji NRI movement liasü. Mahatma Gandhi ya NRI liasü, Jawaharlal Nehru England nungi meyipa aru (NRI), Ambedkar, Azad aser Patel nunger ajak NRIs liasü,” ta metetdaktsü.
Tang Rahul Gandhi-i hopta ana tashi United States semdanga lir.
Linük tenteter lenirtem dak sendakba nung Rahul-i, “Parnok ajak India adener bendangleni ao aser India-i meyipa aru aser kari parnok tasatem amshia India melenshitsü,” ta ashi.
Item ama NRIs aikati India atema inyak aser ano parnok mapa atema parnok aika nem tim tetushi magütsüi lir, ta Congress lenirisa ashi.
White Revolution tenzüksang, Verghese Kurien-a non-resident Indian liasü, ta paisa ashi.
“India nung takok tulutibaji India nungeri kanga sapua ajemba mamatzü liasü, iba ya nisung ka tenüng agi Kurien-i tenzük, aser pa ya NRI ka liasü. Pa United States nungi meyipa aru aser pai India melenshitsü. Iba amaji ano nisung aika nem asenoki tetushi magütsüi lir,” ta paisa metetdaktsü.
US nung alir India nunger tushia Rahul-i, parnok bendanglen alir, anungji parnoki linük terenlok atema kecha meinyaktettsü, ta mali, atangji nungbo nenok ya India tongtirettem lir, ta ashi.
“Iba linük tesem ajungalen reprangdangang, India nunger kati America atema aser India atema inyaktsür, yimjung nung alir, aser iba linük (US) den külemi asen linük yangerba nung shilem agir. Atangji nungbo nenok ya linük tongtiret lir,” ta paisa ashi.
Tang Centre nung BJP-i aniba sorkar aija pai, sorkari linük lanurtem atema mapa madoktsütet, ta ashi.
“Tang India nung tayongzükba tulutibaji, lanur 30,000-i mapa bushiba nungi parnok 450-i dang mapa angur. Iba amai dang ora kechi ataloktsüar memetet,” ta paisa shisem.