Gandhi noksa agi Modi noksa melenba opposition-i aitsür

New Delhi, January 13 (Agencies): Khadi Village Industries Commission (KVIC) indang 2017 calender aser diary nung Ato kilonser, Narendra Modi-i Mahatma Ghandi melena pa noksa amshiba atema Hokolbarnü opposition party temi sashia aitsüogo.
Kümshia KVIC calendar nung Mahatma Gandhi-i ang ainba noksa amshia arur, ajisüaka takümbo Modi noksa amshi.
Brihostibarnü osang ka ajanga ashiba agi, KVIC calendar nung Mahatma Gandhi ang ainba noksa masü saka Modi-i ang ainba noksa lir, ta metetdaktsü.
Ibaji anema Congress, Left, Trinamool Congress aser Aam Aadmi Party densema opposition party temi Modi aija, “Linük tebutiji melentsü makok,” ta ashi.
Osangbenertem den jembidang Communist Party of India-Marxist General Secretary, Sitaram Yechury-i, “Iba ama atalokbaji kanga tia maka. Nisung shingaia Mahatma Gandhi melentsü makok. Ibaji Prime Minister’s Office den mapet,” ta ashi.
Communist Party of India nung lenir tain, Gurudas Dasgupta-ia Ato kilonser, Modi aija, “Ni kü tejashi lemsatsüsa ojang ka dang lir- iba ya kangamajung,” ta ashi.
Ano külen Congress-i, “iba ya tai metoktetba temenen” ta shia party tatong Tir, Rahul Gandhi-i Ato kilonser aitsü.
Congress Party lenir, Randeep Surjewala-i, “Khadi aser Gandhi ji asen putiotsü, peisasa litetba aser nüjiso atema raraba temaitsü lir. Gandhi noksa agienbaji tai metoktetba temenen,” ta ashi.
“Mahatma Gandhi-i meraratsü atema ayongzükba temaitsü Modi-i agitsü merangbaji mezüngmeshi lir,” ta paisa ashi.
Iba tatalokba aija Janata Dal-United-i item calendar aser diary nung Modi noksa alibaji agientsüla, ta takhangba agutsü.
Osangbenertem den jembidang JD (U) otongdar, K.C. Tyagi-i, Onoki iba telemtetbaji sashia aitsür. Ibaji asen lenir aser ajungmsor, Mahatma mezüngmeshiba lir. Paji ajak dang tematiba, aser Modi-i pa den medemdangtsü makok. KVIC-i Mahatma Gandhi aketba noksa tanaben adoktsüla,” ta ashi.
Trinamool Congress nungi Rajya Sabha MP, S.S. Roy-ia, “Putu 20buba nung Mahatma Gandhi ji India nung dang masü saka alima ajaklen lenir tajungtiba liasü. Nisung ka ofiice temaba nung liaka pai Gandhi melentsü makok. Mahatma Gandhi den medemdangbaji tai metoktetba temenen lir,” ta ashi.
Trinamool tongti aser West Bengal Chief Minister, Mamata Banerjee-ia twitter ajanga, “Gandhi ji Linük tebuti lir. Modi ji shiba?” ta asüngdang.
Ajisüaka BJP lenir aser Union Minister, Kalraj Mishra-ibo, “Ibaji Modi-i Gandhi melen ta ashitsü makok. Calender nung tapaktemji ita sasep nung lir, aser tapak ka nungdang Modi noksa lir,” ta ashi.