Gandhi’er kibongi Parliament nung timtem agütsür: PM Modi

Moran (Assam), February 05 (Agencies): Congress Party masü saka Sonia Gandhi’er kibong kija tenüng teta Hokolbar Ato kilonser, Narendra Modi-i, 2014 Lok Sabha election nung tamakok anguba mayangtsü atema Congress Tir, Sonia Gandhi aser lar jabaso Rahul nati Parliament nung timtem agütsür, aser ibaji ajanga sensakertem tajangzük angutsü bill tem nokdanger, ta aitsüogo.
Assembly election agitsü aliba state, Assam nung süngolu nung inyakertem den jembidang Modi-i, “Kibong kati ‘negative politics’ benoker, kechiyong Congress dak alia tanga opposition party temibo ni anemaka Parliament junga kadaktsüner,” ta ashi.
Modi-i Assam nüburtem dang, state nung BJP-i sorkar akumtsü maongka agüjang ta mepishi.
“Election (2014 Lok Sabha) nung tamakok angurtem 400 (menden) nungi 40 tashi aluogo aser parnoki Modi mapa inyaktsü memelar. Parnoki timtem aser tetsükdaktsü agütsütsü lemetogo. Iba sentong tamajungji (parnoki) maneni inyaker,” ta Modi-i ashi.
Lokti senden nungsa Modi-i, “Congress tamakok ngudaktsüba ajanga tangbo parnoki nüburtem aser sensakertem ajanga mangyangtsü lemtetogo,” ta ashi.
Taoba Parliament senden ana nung GST Bill densema rongsenkettsüng dak sentakba tongtibang bill tem magizüktetba atema tanü Modi-i Congress aija item o jembiogo.
“Modi, BJP aser sorkar anemer party tem aser lenirtem-a aika lir, ajisüaka parnoki senden junga kadaktsüner. Ajisüaka ‘kibong kati’ tekong meranga Rajya Sabha senden makadaktsür aser linük terenlok onüktem nokdanger, kechiyong linük nüburtemi parnok tamakok ngudaktsü,” ta Modi-i ashi.
Modi-i ‘kibong ka’ ji metetshiaka iba ya Sonia Gandhi’er kibong indang jembiba lir.
“Tetsükdaktsü agütsüba politics ajanga iba linük tajangzük mangutsü. Iba tangatetbaji kibong ka dak dang lir, ibayongiji iba ama tetsükdaktsü bener arutsüogo. Tanga oppsition party lenirtembo yamaji masü. Tetsükdaktsü bener arutsüba politics ajanga parnok mesüra linük naprong tajangzük mangutsü,” ta pai ashi.
BJP-i state sorkar akumtsü maongka agüjang ta mepishia Modi-i, Centre-i ashi angaba sorkar ka Guwahati nung alinungang state jenjang ajungtsü onüktem benoktsütsü, ta ashi.
North-east state tem nung terenlok akatsüsa jenjang junga liaka tesem den tesentaktep majungba ajanga tetsükdaktsü adoker, ta paisa shisem.