Ganga nung ‘selfie’ tangokdang kaketshir 7 asü

Kanpur, June 22 (Agencies): Tanü Ganga ayong nung peisasa noksa tangokdang (selfie) arishi küm 19  kaketshir tebur ka den par medemer trok densema arakseta süogo.
Tanü tzünglu aruba sülen arishi küm 20 ser tema lanur tebur tenet Ganga ayongi tzü awai aoba sülen iba lendong atalok, ta Senior Superintendent of Police, Shalabh Mathur-i ashi.
Superintendent of Police Sachindra Patel-i ashiba agi, “Tzü chigodang Shivam-i selfie ka tangokdang pa ajemchir ayong nung araksetba ngua par medemer Maqsood-i pa kümzüktsü merang, ajisüaka tzü tarok asübayong paa alanger arakseta alidang par medemer kati ka kümzüktsü meranga tzü nung pongokja parnok ajak arakseta asü.”
Ghonda ana tsüngda tzü telungi ayir telok kati tasümang tenetprongji agitet, ta Patel-isa ashi.
Iba tatalokba ya bushisüngdangtsü, ta Mathur-i ashi.
Taküm January ita nunga Mumbai nung aliba Bandra Fort anasa tetsür asem selfie tangokdang Arabian Sea nung tsüka arakseta asü. Parnok kümzüktsü merangdang tebur kata arakseta asü.