Gaon Bora Union, CTN Silver Jubilee Souvenir sayaogo

Changtongya town, August 16 (TYO): Gaon bora Union, Changtongya Town Silver Jubilee Temoatsü aser takok manung monga aruogo; Küm 25 lia aruba otsü kaket tarutsü anogotem, talisa Golden Jubilee mapang teyari tulu asutsü nükla yur Jubilee Mong amongba Noksa aser nüngdakba ajak inoksemer tang iba otsü kaket ‘SOUVENIR”  August 12, 2017 nü Wb. T. Ali Longkumer, Headmaster, GHS Bura Namsang ajanga sayatsüogo.

Pai mapang tatsüka agia jembidang pai, asen lima nung Gaon Bora nem agutsüba tashi aser khuretji atamata masü, anungji G.B shia-i ano maneni bendanga agutsür tali takangba aser tashi taitba küma longjemshir Gaon Bora Union, CTN Town bener aoba ajanga asen lima yanglushiba nung shilem tulu agitsü imlaseta atar, ta ajungshi Paisa G.B’s Union nem senotsü tenla tulu aguja liasü.

Iba sentong nungsa Wb.Nungsanglemba Lkr, Convenor, Editorial Committee ajanga iba otsü kaket asoshi inyaka aruba rasaa ashiba den ocet zülur aser teyariteper ajak dang pelaba metetdaktsü aser Jubilee Planning Committee Convenor Wb.S.T.Yanger Jamir ajanga mapang tatsüka agia pelaba aser tayongzükba olen kar shia liasü.

Iba sentong ya Wb.Imkongsowa, Head G.B & Chairman, G.B’s Union CTN leniba nung agi aser paisa Jubilee takok ngua amongba aser iba otsü kaket takok ngua adokteta sayaba anogo tashi nung maparen balala ajak nung shirnokisa yaritepogo, ajak dang kanga pelar ta metetdaktsü.