Gaon Bura aser sorkar mapa inyakertem kümdanga alitsü metetdaktsür

Dimapur, January 21 (TYO) : Lungkak aitba sentong/mokdangba amala ayongertem/teloktemi sentong agidang tiptema aser ozüngi melaba ama agidaktsütsüla ta sorkari District Administration aser Police nem tetuyuba ka agütsüogo.
Lungkak aitba sentong agidang lungkak aitertemi ozüng alema mapa inyakra, nisungtem yirutsüsa/tasüba mesüra nija/sorkar indang kiojentem raksatsüsa tensa atalokra, sentong ayongertem dak tai tongloktsütsü aser parnoki iba tebilemtsü khuret abentsü, ta CMO Media Cell sangdong ka nung metetdaktsüogo.
Ano külen, Nagaland state nung Urban Local Bodies election magidaktsütsü atema loktitemi ayongzükba sentongtem nung Gaon Bura temi shilem agiba osang angazükogo. Gaon Bura temji District Administration-i sorkar den yariteptsü atema shimba lir. Anungji, sorkar sentong mesüra telemtetba anema lungkak aitba sentong nung parnok shilem magitsüla.
Kasaji, sorkar mapa inyakertema ‘conduct rules’ ajanga alenbanga lir. Anungji, Gaon Bura mesüra Government Servant kar danga Urban Local Bodies indang elections magidaktsütsü atema inyakba mapa nung shilem agiba putetra, District Administration-i pa/la anema ken o benoka angadangtsü aser iba atemaji sorkari tetuyuba agütsüogo, ta CMO Media Cell sangdong nungsa metetdaktsüogo.