Gari agi nisung tsüksetba atema tanur tebu ka pua lir

New Delhi, April 9 (Agencies) : Anogo pezü tejakdang arishi küm 33 tain, business consultant ka tsüksetba atema tanur tebu ka khenü atema police ket nung yua lir.
Manoj Aggarwal ya Hokolbarnü pua Metropolitan Magistrate Sachin Sangwan madangi anir ao aser Deobarnü Delhi police-i pa dang asüngdangyatsü asoshi Sachin-i temelaba agütsüogo.
Tanuri tesüiba mapang nunga lendong menaba meteta lir sür nung tebui pa nem gari sabi agüja gari anidaktsü, ta Delhi police-i court dang ashi.
Police-i, “Aggarwal-i par jabaso khen danga gari anitsü menokdang aser ibaji ozüng alema lir kechiba süra par jabasoji gari anitsü ano küm agi matong,” ta ashi.
Aggarwal ya asaa nisung tepsetba ozüng kübok apuer masü, ta police-i jangjatsüogo.
Tamalena iba tanur yagi gari mekümdangi aniba ajanga tanga gari ka den tsüktepa lenmang nung lendong mena, ta police-i shisem.
Hombarnü tanübusangi north Delhi, Sham Nath Marg lenmang nung Mercedes gariji kanga kara anir aoba mapang Sidhharth Sharma dak atsük. Pa ya anasa aliba bazzar nung lijalirongtsü atema oyaa lia iba lendong ajurua asü.
CCTV ajanga iba tanubusangi gari latetja aliba dang nung tekaraba anir aoba putet, ta police-isa ashi.
Police-i tanubusang ya Monulbarnü apu, ajisüaka bail nung chiok. Pa anema mekümdangba ajanga nisung asüba ken o ka benoka lir.