Gari amshiba awashi

Tanü asüng putu yimya agi akanger asünungji gari akar kanga aika kümogo. Iba jagi asen lima nung yimti yimdong lenmangbo tilala dang asünungji jilatem nung dang masü saka yimtak yimtsüng nung dena anogo shia gari masem nungtepba timtem ajurur. Tanga temetetter limatem nungbo yimti mesemtetdang tamasayongi gari senzütsü aser anentsü asoshi bilema yimdong sademsadema wazüka yutsür, iba jagi gari teimba akümyonga asen lima nung ajuruba timtem amaibo majurur. Atangji, yashi tashi asen lima nung kanga tulur mesüra kanga takar kari dang jeep gari amshia aru aser nübortembo bus nung mesüra tetsüng agidang jajaa liasü. Iba amaji dang teti alitsü ta asenoki bilem, iba jagi kiojen yangludanga gari tonga arutsüsa yanglutsübo temulung dangia maru. Iba ama shisa tatsü agi tanü asen lima nung aliba town-tem ya mesemtetba agi tanü asenok tim atemer. Joko, tanübo Nagaland nung yimti tuluba ana, Kohima aser Dimapur tia reprangdangra, nüngdak tulu aritepa senzütsü asüdangbo gari nung masü saka tetsüng agi senzüang nüngdak tekaraba atemer. Aji oda, tesem ka nungi ka atongdang anogo talangbaka lenmang nung endoker aser idangji senden memeneper aser mapa inyaktsüa menuadoker. Iba takoksaji asenoki asadangra sen jenjang aika adoktsü. Iba ama lenmang mesademba ajanga lenmang nung gari moutet totzü tsükdokba, nübo amajok nung endokba aser mapa meinyaktet menuba tensa tia ya jungjunga bilemdanger state nung sentong atongertemi nübortem anisüngzüktsüsa tapet lenmang kar bushitsüla. Atangji, mezüngbuba nung gari anishirtemi gari anidang tama meraktepi awashia meteta anitsübaj tongtibang aser ano gari anendak tesem shitak nung timi anena yutsütsübaji kanga tongtibang teinyaktsü kümogo. Garibo zünger mezüngma, yimdong lenmangbo ilara aser gari anishirtemi traffic ozüng memetet ta asüba tia nung tanü asenok timtemteper. Gari anishir aikati gari atemloker anir ao ashiba dak alaka traffic point atongdanga traffic police tetuyuba merepranger aser kongbo anentsüla aser kongbo manentsüla, itemji kecha mereprangi pei anennüdak anenyonga aor. Atangji, ibaji mesayuba aser mangazükba ajanga lir. Iba jagi balaka timtem ajurur. Shitakba agibo item ajakji school nung azüngtsüla. Iba tashiji state government nung sentong yanglurtemi apiteta inyaktsü junger. Tanübo nisungtemi temeteta memetet aser meteta alirtemia tashi manger asünungji, traffic police-tem tesem ajaklen nokdaka yur ozüng amshitsüsa akümer. Iba amaji gari amshirtem yimya sübadakja azüoktsü asoshi Dimapur nung traffic police-temi inyakyim tesashi ka tenzükogo. Joko, shirnoki tetsüng ana aketba gari anentsüla nung tetsüng pezü aketba gari anendir mesüra tetsüng pezü aketba gari anentsüla nung  tetsüng ana aketba gari anendir, item garitemji moutettsüsa tetsüng nung yin küpdang ka alenloka toktsür aser kiburtem arur temerenshi agir dang chioker. Asenokbo yamaji tetenzük nungi angazük tenzüktsübaji nüngdaker. Ano, asenoki metettsüba kaji lenmang ilaba ajanga gari nungtepa yur moutet timatemba dang masü saka kodang asenoki traffic rules mebenshii gari mashimashi anidir aser tama raktepa tangar gari alemtettsü merangdir, idangji lendong ajurur. Item timtem aser lendong nungi jenbua alitsü asoshi asenok ajaki yimya awashi meteta gari anitsü merangtsüla. Aji oda, kodang asenok ajaki yimya awashi meteta traffic ozüng kübok tashi angaa gari anidir, iba jagi lendong timtem paidokba dang masü saka asen lima topur jungdaktsür. Ano, gari anirtemi metettsüba kaji lenmang ajangdanga aotsü asoshi akok tashi tetsüng agir senzürtem nem lenmang ayaoktsütsüla aser tsüngsang majungdang tangar dak motzü seploktsütsüsa manitsüla. Atangji, tanü asüngbo akok tashi gari yutsür tetsüng agi jajaba tajungba, iba jagi asen mapa karaa inyaktettsü, temang pongbaa akümtsü aser tzü moponga memenentsütsü. Ibaji temulung nung yur ano kodang gari amshitsüsa kümdir, yimya awashi meteta anitsü mamatsüla.