Gari auyaba ken o nung Assam Police-i Naga nunger pungu apu

Golaghat, Metsüremi/March 31 (Agencies): Golaghat jila kübok March 30, 2019 Honibarnü gari ka auyaba ken o dak sendakba nung Assam Police-i Naga nunger lanur pungu pua, Morigaon police station nung ken o benokogo, ta Assam Police osang ajanga metetedaktsü.
Naga nunger lanur pungu ya Bito Katty, Kimiyato Swu, Aboto Zhimo, Nagato Awomi aser Hekato Sumi ta jangjaogo.
Assam Police osang ajanga ashiba agi, Morigaon tesem nungi aoertemi auya bener aruba gari ka alizüktsü atema par pungu ya Gologhat-i aru aser iba mapang Police-i par pongu prongla apu.
Morigaon district nung superintendent of police, Swapnaneel Deka-i ashiba agi, anogo ka tejakdang gari auyaba ken o dak sendakba nung pur alir auer par asemi nangzükba sülen Nagaland nungi par pongu ya putet.
Osang ajanga angazükba agi, March 29, 2019 Hokolbarnü Morigaon tesem nungi apuba auer asem tenüngji Naba Das, Ashadul Rahman aser Rana Bhatta nunger ta jangjaogo.
Morigaon SP-i ashiba agi, Assam ajunga nung gari auyatepba maparen ya state tsüngda nung auertem sendaktepa lir aser parnoki longjemer inyaker.
SP Deka-isa ashiba agi, Hokulbarnü Morigaon nungi apur par asemi, gari ya auyar sülen Golaghat tesem nung Nagaland nungi tali arur par pongu dang ayoktsü atema asalentong yanglua liasü.
Par asem anir Morigaon Police Golaghat tesem jagi ao aser idakji police-i talirtemji (Naga nunger pungu) pua liasü, ta Deka-i ashi.