Gari lendong atalokdak tesem yanglushiba nung sen crore 11,000 endoktsü

New Delhi, January 12 : Linük nung küm shia gari lendong lakh 5 shi atalokbaji taoksatsüka lir, anungji item lendong atalokba tesemtemji reprangshia yanglushitsü asoshi küm 5 sentong nung sen crore 11,000 endoktsü ta Union minister Nitin Gadkarii metetdaktsü.

“Gari lendong atalokba agi küm nung takoksa sen crore 55,000 nungi 60,000 tashi adoker aser ibaji inyakdangra linük nung GDP 3 % adoker,” ta paisa ashi.

Item gari lendongtem nung tejashitsü kaji lanurtem arishi küm 22 nungi 33 tashi purtem teimba asür. Anungji, item lendongtemji nokdangtsü asoshi tang tashi nung gari lendong kanga bolua atalokdak linük nung tesem 726 nguteta lir,” ta Road Transport & Highways Minister, Gadkariisa metetdaktsü.

New Delhi nung osangbenertem den jembidang, pai ashiba agi taruba küm 5 tsüngda nung gari lendong atalokba tesemtem yanglushitsü asoshi sen crore 11,000 endoktsü. Iba sen jagi lenmang yanglushiba den ano alilen aser azüklen lenmang talila yanglutsüba mapatem inyaktsü ta paisa metetdaktsü.

Delhi nungbo tanü Hombar nü nungi tenzüka gari lendong teti atalokdak tesem 10 shimteta yanglushi tenzükogo. Item tesemtem kar nungbo gari lendong atalokba nung nisung 150 tashi asüba osang liasü.

Delhi nung gari lendong kanga bolua atalokba tesem tang yanglushitsü tenzükbatemji Sarai Kale Khan, Kashmere Gate chowk (Morigate), Nigam Bodh Ghat, Mukundpur Chowk, Dr Bhahbha Marg crossing, Punjabi Bagh Chowk, ISBT Kashmere Gate, Mahipalpur Flyover, Shani Mandir aser Shahdara Flyover nungertem liasü.

” Linük nung küm nung gari lendong lakh 5 ataloker, item lendong nung nisung lakh 1.5 shi asür aser nisung lakh asem shi masüyonga taküm telemta kümer lir. Iba tashijibo tongpang rara nunga masür aser tashidak wara nunga masür. Ibai kanga süoki ia inyaktsüba mapa ka lir ta Gadkariisa ashi.

Paisa state sorkar aser municipal nung ketdangsertem dang State Highways aser asenok anogo shia jajaba lenmangtem teti repranga anepalutsü asoshi mepishia metetdaktsü. Item sentongtem asoshi Central Road Cess nungi state nem senotsü agütsütsü asoshi center sorkar dang asüngdangtsü lemtet.

Paisa ashiba agi, gari anishi angazükba maparen nunga sentong 30 tashi yanglua inyakdagi . Iba gari anishiba sentong temli anogo asem nü tsüngda licence agütsütsü.