Gari lendong ka nung nisung 6 tsükset

Imphal, November 27 (Agencies):Manipur nung gari lendong ka nung nisung trok süogo. Parnok trok rongnung kabo kibong akümtsüba liasü. Iba lendong ya Manipur nung Yairipok- Thoubal lenmang nung Honibarnü atalok.
Osang ajanga ashiba agi, kibong akümtsü alisang aser par medemertem ya tetsürlar kidang nungi ‘Mapam Chakkouba’ sülen kidangi meyiba aruya liasü. Parnok mena aliba gari ya Yairipok-i oya aliba Tata 407 ka den Thoubal nung tsüktep.
Police sangdong ka ajanga ashiba agi, tata gari yagi parnok mena aliba gari dak ya arur atsük asü südi ta temulung melemi bilemer. Iba lendong nung kibong akümtsü alisang dena par medemer ka iba tesem nungji sa süadok. Gari nung mena alir tanungba parnok pongu Thoubal district hospital-i aritepa temang anepalutsü asoshi anir ao, saka doctor temi parnok rongnung anabo tasü bener aru ta metetdaktsü. Yirur rongnung ka temang kanga mejungi lir.
Iba ken o dak sendakba nung Manipur police-i bushisüngdang tenzükogo.