Gari lendong ka nung tesayur ka asüba sülen Khuzama nung tensa mejungi lir

Kohima, December 22 (TYO) : Kohima kübok Khuzama yimtsüng nung National Highway-2, Kohima-Imphal road anasa gari lendong ka nung tesayur ka asüba aser pa kinungtsü den tenu yiruba sülen tensa mejungi lir, ta police-i metetdaktsü.

Hombar nikongtsütsü 5:30 ako meta Khuzama yimtsüng anasa truck gari ka ajungbena Bolero gari ka ma nung meküpokdang Riizhiikhrie Government Higher Secondary School Kohima nung tesayur Kevimhal Thaprii asü aser pa kinungtsü Teisovino aser tenu tetsür Lesashiile na yiru.

Parnok ya Bolero gari nung mener Kohima leni atudang, Manipur nungi aruba truck gari (NL01K-6178) ji ajungbena gari ma nung meküpok.

Asür Kevimhal kinungtsüji mashisa lir aser tenu tenaprongla Intensive Care Unit nung anepaludar. Iba lendong nung asür Kevimhal’er arishi küm 6 tain jala Coyienu tera dang yirua lendong nungi jenbu, ta Kohima Police osang ajanga metetdaktsü.

Tanü asür den tepila sentong tagidak nung lanur kar tejashi nung yim ajanga süiba gari tulutem kar raksatsü, ta Khuzama Youth Organisation, President, Vimeziho-i osangbener dang ashi.

Iba osang angazükba sülen Village Council aser Youth temi tensa azüoktsü atema nisungtem mapa lemzükja lir, ta paisa ashi.

Memetetba lendong nungi jenbutsü atema Manipur kübok Imphal nungi aruba truck gari ajak Mao Gate nung sota lir.

Ano külen, Khuzama Check post aser South Traffic Police Control nem tensa tamajungba küma moudaktsüi azüoktsü atema tetuyuba agütsüogo.