Gari lendong nung nisung 3 asü, tetsür ka tashiyim agi raksatsür tepset

Kolkata, August 21 (Agencies) : Deobarnü West Bengal East Midnapore district nung alir lanur asem mena aliba gari agi tanga gari ka dak oa atsükdang parnok asemprong asü, ta police-i ashi.
Iba gari lendong ya tzüküm indang resort, Mandarmani anasa atalok.
Tasürtemji arishi küm 20 tsüngda purtem lir aser parnokji Kolkata nung alir Vaibhav Rajnish, Suraj Dasgupta aser Shivraj Naskar nunger lir ta jangjaogo.
Kanga mejungi tsüksar aliba gari nungji yi pongdang kar nungteta lir aser iba lendong ya yi agi mesepa jemer gari aniba ajanga atalok asütsü südi ta police-i temulung melemi bilemer.
Kasa district nung Deobarnüsa ano tatalokba balaka nung arishi küm 12 tain tetsür ka indang tasümang nguteta lir aser la den tashiyim agi shi nung medemba sülen la tepseta yutsü asütsü akok ta police temi temulung melemi bilemer.
Class asem nung züng yaa alila tasümang ya district nung Kharagpur subdivision kübok Debra nung aliba ki ka nungi ngutet.
Asür kinungertemi la tepseterji kasa tesem nung alir, Sanjay mapa lir ta ken o benokogo. Iba asangur yagi la puer oa tashiyim agi raksatsüba sülen tepseta yutsü ta lar kinungertemi benokba case nung shia lir.
Sanjay ya tang jenshia senzüdar saka police-i maneni pa aputsü bushidar.