Gari lenmang yanglushitsü atema Nagaland nem sen crore 340 lemzüktsü

Kohima, September 20 (TYO): Smart City project atema yimti 27 shimtetba rongnung Nagaland yimtiba Kohima densemba dang masü saka Nagaland Chief Minister, T.R Zeliang-i sen crore 340 indang lenmang yanglutsü atema sen meshizüktetogo.
Ano, Nagaland atema High Court balaka lapoktsü atema Union Ministry of Law & Justice-i Chief Minister dang nangzükogo.
Kohima Smart City ka kümdaktsütsü atema T.R Zeliang-i kanga dang meranga mapa inyak aser pai tesüiba ita ishika tsüngda Consultants, department ketdangsertem aser sendaktepba alirtem den ajurutepa sendentem amen, ta tanü CMO Media Cell-i sangdong ka nung metetdaktsü.
Smart City atema mezüngbuba aser tanabuba list nung medensemaka Chief Minister-i bangdak department dang metokmeperibatem reprangshimtsü aser Smart City atema züngsemtsü ayongzüka aru.
TR Zeliang-isa Municipal Affairs Parliamentary Secretary, Tohanba den külemi Centre nung lennir balala aden ajurutep aser otsüsütsü aketba Kohima yimti indang osangtem metetdaktsü, ta sangdong nungsa shia lir.
Tang pa Delhi nung oa lir, aser tanü pai Smart City nung Kohima shimokba osang angashiba sülen bangdak department nung ketdangsertem den phone ajanga jembi aser parnok nem tenüngsang agütsü. Asüng pai Union Minister den ajurutepa tepela lemsateptsü, ta Media Cell sangdong nungsa metetdaktsü.
Ano külen, tanü anüngdang Ministry of Road Transport and Highways nung Finance Committee-i Dimapur nungi Chumukedima aser Kohima Check Gate nungi Lerie gari lenmang yanglushitsü atema sen crore 340 agütsütsü mulunga agizük.
Tanü sen lemzüktsübaji National Highway 4-Laning project den sendaktepa mali.
Tanü CM, TR Zeliang den Law & Justice Parliamentary Secy., Picto nati  Law & Justice Union Minister, Ravi Shankar den ajurutep aser Nagaland atema High Court balaka lapoktsü indang onük lemsatep.
Union Minister-i iba onük kanga junga angaba sülen tongtipang onük ka ama iba asoshi mapa inyaktsü ta Chief Minister dang nangzük, ta Media Cell sangdong nungsa ashi.