Gari mekümdangi aniba atema ozüng tesashiba yangluang: SC

New Delhi, December 07 (Agencies): Gari mekümdangi aser zübazülema anishiba ajanga nisung asüba atema tepoukdak küm ana puoka ayuba jagi meperi, ta shia Supreme Court-i Centre dang, iba dang nungi temerenshi tesashiba agutsütsü atema ozüng tesashiba yangluang, ta tuyuogo.
Justices- Dipak Misra aser Amitava Roy nati akumba bench-i, lenmang nung jajartem aser gari anirtem lendongi maitsü atema gari mekümdangi anirtem melungjang nung tsübutsü alitsü asoshi ozüng tesashiba yanglutsüla, ta ashi.
Bench-isa Centre dang hopta 8 tsüngda iba onük atemaji inyakang, ta tuyu.
Supreme Court-i Attorney General, Mukul Rohatgi dang, iba onükji reprangshitsü atema sorkar nem metetdakjang aser gari mekümdangi aniba ajanga nisung südaktsüba atema ozüng tesashiba yangluang, ta metetdaktsü.
Ibaji langzüa Attorney-i bench dang, bill ka Parliament nung anendaka lir aser pai iba onük atema tim ketdangsertem dang ashitsü ta metetdaktsü.
Bench-i, “Onoki iba ya ashitsüsa akumer, kechiyong nisungtem gari lenmang lendong nung asür. Nüburtem pei taküm samar aser tetsüng-teben lemtar. Tatalokba aika nung nisungtem aika teti atema lemtar. Nisungtemi aginüaka maginüaka ozüng tesashi alitsüla,” ta ashi.
Gagi mekümdangi aser zübazülema aniba ajanga India nung anogoshia nisung 400 jungnüa asür ta shia Court-i, iba ama aibelen atema küm ana tepuokdak ayuba temerenshi ajanga nisungtem mekümdanger, anungji ozüng yanglurtemi IPC Section 304A yanglushitsüla aser temerenshi tesashiba atema ozüng yanglushitsüla, ta ashi.
Section 304A nung, “Shirnoki mekümdangi gari aniba ajanga nisung kar südaktsüdir term ka tepoukdak ayutsü aser ibaji küm ana tashi akümtsü akok, mesüra senchi achitsü, mesüra temerenshi anaprong agütsütsü,” ta shia lir.
Tamalen Supreme Court-i sorkar dang tuyuba ama sorkari meinyakba dak sentakba nung bench-i, “Onoki obendang agütsüba nung, Section 304A yanglushitsü atema shiogo, saka sorkari mera kata magi. Iba ya tebilemtsü onük ka lir,” ta metetdaktsü.