Gari nung tanür kija meyutsütsü ozüng ka yanglutsüla

New Delhi, Sep 10 (Agencies): Gurgaon nung tetsür aianu ana gari nung shibanga yutsür aoba ajanga tango mesashiteti asüba sülen Brihostibar nü tanur anepalur mongintemi, tsüraburtemi tanur kija gari nung yutsür maotsü atema ozüng tesashi ka yanglutsübaji tang rongdak nüngdak kümogo, ta metetdaktsü.

Gurgaon, Haryana nung Bhodbar nü arishi küm 4, Himanshi aser tenu arishi küm 2, Pinki na gari telung nung atsükshishi sayadang memeteti tena sasa tena mena aliba par gari lock asü. Tena mozü kidangi bener oa atongdangbo südoker liasü.

Gari ji asenok oli aruli jajatsü asoshi kanga junger saka tanür kija gari nung yutsür aobaji lendong lir, ta mongintemi ashi.

Sir Ganga Ram Hospital nung inyaker tanur anema aliyim tsütsü mongin, Dr. Dhiren Gupta-i, gari nung tanur kija yutsüba ajanga ghonda ishika tsüngda nung tanurji tango mesashitetti süadoktsü, ta ashi.

“Tanga linük nungbo tanur küm tatakzük ka nungi gari nung kija meyutsütsü ozüng tesashi lateta lir. Anungji tanur tango mesabo taküm samaba nungi kümzüktsü asoshi asen linük nunga iba amala ozüng tesashi kar nüngdaker,” ta Gupta-i IANS osangbenertem dang ashi.

Pai ashiba agi, tanü asüng garitem nung ‘central lock system’ aliba ajanga tanuri pei sasa gari nungi matokteter. Anungji ibaji ajanga gari telung nung aliba oxygen agimar külen tanur tango mesaboi timtemtsü mesüra asütsü.

Gari ka nung oxygen litre 60 shi dang alir aser ibaji tanuri ghonda trok shi nung agimatsü. Aji dang masü saka gari ji anü tashii apudak anena yura tanur temang kanga tatsük küma iba dang nungi mapang tatsüba nung iba oxygen ji agimatsü.

“Tsüraburtemi gari nung ‘air condition’ tsükloka yutsür aotsübajia kanga dang lendong kechiba süra gari sapi tsükloka ayuba ajanga carbon monoxide adokdaktsütsü aser ibaji ajanga tanur miim agisemtsü koba agi tekolok nung timtem tulu agütsütsü. Ano gari yangluba tesem kar anasa AC tsükloka yutsür aoba agi gari telungi item tango tamajung atsüoktsü,” ta Gupta-i ashi.

All India Institute of Medical Sciences nung tanur anema aliyim tsütsü mongin Dr. V.K. Paul-i ashiba agi, gari telung nung tanur mapa talangka yutsüba ajanga parnok temang nung aliba tzü ajema akümer aser ibaji ajanga parnok süchia aoer.

Ghaziabad, Uttar Pradesh nunga March ita nung tanur pezü gari telung nung lia ken atema system majungba ajanga yangnungjagi mi adoka gari nung tanur pokshishitsü enoka aliba nung jangruloker gari arungdang rongseta asü.

Tuticorin, Tamil Nadu nung 2014 April ita nung tanur pezü gari ka anena aliba telungi tua asaya kazüdang memeteti gari lock süadok. Ghonda ishika lir par pezü prongla sür liasü. Parnok ya arishi küm 4, 7, 8 aser 10 nunger liasü.