Gari sabi melena app ka ajanga gari atemloktettsü

New York, February 20 (Agencies): Sweden nung gari yanglur telok, Volvo company-i smartphone app ka ajanga gari sabi medeni gari atemloktsü tendangba maparen tenzükogo aser gari atemloktsü sabi mali ayoktsü mapaji parnoki mezüng inyaker asütsü.
“Iba digital key technology app ya bluetooth ajanga amshitettsü aser gari sabi agi inyakba mapa ajak inyaktettsü,” ta Hokolbarnü nydailynews.com ajanga metetdaktsü.
“Iba app ajanga gari anirtemi ‘digital sabi’ aika yutettsü maongka angutsü aser ibaji ajanga tesem balala nung volvo gari balala atemloktettsü. Anungji volvo gari dang süra, iba app ajanga kibong aser mapa nung nüngdakba mapang nisung mashi kati gari anir otettsü,” ta kasa osang ajanga ashi.
Iba app yagi alima ajak nung ‘car rental’ tesem nungi gari amshiba nunga yaritsü aser nü phone-i iba gari indang ‘digital key’ yoktsü.
“Volvo company nung technology mapaji kanga reta agir. Technology tasen ajanga customer tem anisüngzükdakja parnok mapang kümzükba tsütsü tajangzük agütsütsüla,” ta Volvo product strategy & vehicle line management nung Tatong Tir, Henrik Green-i sangdong ka ajanga ashi.
Parnoki ashiba agi iba technology ya 2017 nungibo mapa küma amshitetsü imlar.