Gari shitak aniba

Tanübo asenoka tangar lima tejakleni aoba terenlok mapatem agi menepa adok nungji, nisung aika asoshi gari akatsübaji kanga nüngdaka akümer, iba jagi bank nungi sen apua asüyongya gari alia amshir. Iba denji ano gari alinürtem asoshia bank nungi sen melamelaa aputetter. Ano, tanü asüng ita sen achirtema sen aika angur aser business inyakertema tajangzük tulu angur. Aji oda, nüngdak dang masü saka gari alitettsüsa nübortem rongsen jenjang nung tajungba aküm nungji ita shia gari renlokba asenoki angutsü. Iba ama tensa mapang ka nung gari anirtemi gari aniba yimya aser ozüng meteta anitsübaji kanga tongtibang kümogo. Gari anitsüba ya odang atemloker pei anishinütsü ania aotsüba masü saka tangar nem timtem magütsütsüsa aser lendong majurutsüsa anitsübaji kanga tenüngdaktsü lir. Item temetettsütemji metetdakja nübortem nem tangatetba agütsütsü asoshi küm shia government sentong kübok “Road Safety Week” amonger. Iba hoptaji Nagaland nunga yakanü tashi mongogo. Atangji gari anirtem ajaki karaa tongnür anungji karaa anir. Ajisüaka, yimti nungbo pei aninutsü anitsübaji masü saka ajak atema speed limit ka yuja lir, anungji iba speed limit dang nungi tekarabaa manitsü aser meilongibaa manitsü. Aikati gari karaa anibaji dang shitak masü amai bilemer saka meilongi aniba ajangaa tangar nem timtem agütsür, ibaji gari anirtemi metettsüla. Ano, yimti nung gari ajak timi senzüdaktsütsü asoshi police point lir aser police point shia len sayutsü asoshi traffic police yutsür. Ano tanü asüngbo police melena light signal ta yutsür. Item ajakji gari anirtemi repranga anidaktsübaji kanga nungdaker. Aiben gari anirtemi traffic lights aser signal mereprangba ajanga lendong ataloker. Ano gari anishirtemi awashi metettsüba kaji kodanga tama raktepa aotsü memerangtsüla aser tetsüng agi senzurtem nem lenmang ajangdanga aotsü asoshi mapang agütsütsüla. Atangji, gari lendong mataloktsü atema gari anishirtem dang masü saka garia shitak alitsüla. Asen lima ama nung gari lendong atalokbaji asenok aikati gari shitak anepalua mayur aser ano tanishi junga mashiyonga driving licence angur. Ano tajung amato saka teti lendong bener arutsüsa asenoki inyakba mapa kaji gari lendong atalokba ajunga nung taidokteper ayur. Atangji, taitoktepbaji junger saka gari anishisangjibosa pa mesüra la dak alang ozung nung aliba ama temerenshi angutsüla. Iba jagi dang ajak tan asütsü. Ajisüaka, asenoki aiben gari raksaba menokra ojang ta asüba nung taidokteper ayur. Iba jagi gari anishirtem zübazülemdaktsür. Ano tekümdangtsü kaji tanurtem küm agi memeshidang gari anidaktsüba ya asütsü. Item ajakji traffic police-temi junga reprangtsüla. Khenkhenbo traffic point anükera mali angur. Iba jagi gari lendong atalokba dang masü saka asen lima jakla majung sayur. Gari teimba akümba ama lenmang ulushia meyanglutettsüa akok saka gari anir aser traffic police-tem ajaki pei mapa shitak inyakra gari lendongtem nungi kümzuktsü aser yimya awashi meteta gari aniba agi asen lima topur junga akümtsü.