Gari tsükokba lendong ka nung raliwalir 6 asü

Gangtok, May 31 (Agencies): Mongolbar aonung Sikkim nung gari tsükokba lendong ka nung raliwalir 6 süogo. Parnok rongnung Bengal nung 2 aser Odisha nung 4 ta liasü. Gari lendong nungsa densemer ana kanga mejungi yirur Gangtok nung private mozüki ka nung temang anepaludar. Iba lendong nung ya gari anisang dena yirua laisü.
Kümtem tsüngda nung raliwalir densema gari tsükokba rongnung tanga atalokba ya tamajungba lir. March-April-May aser October-November tsüngda nung raliwalirtem aikati Sikkim semdanger aser parnok rongnung Bengal nungi timba alir.
Bengal aser Odisha nungi kibong ana ya North Sikkim, Lachung tesem nungi meyipa aruba mapang parnok amenba gari Gangtok nungi km 6 shi pilar Tashi View Point anasa tsükok. “Raliwalir 8 rongnungi par 6 iba tesem nung süadok,” ta Gangtok Sadar Police Station, station house officer Bijay Subba-i ashi.
“Tasürtem rongnung tanur ana aser tetsür ana ta densema lir. Bengal nungi raliwalirtem ya North 24 Parganas district nungi lir,” ta Subba-i ashi.
Raliwalirtem ya May 28 nü Gangtok atong aser Tibet lenmang nung Joden Hotel nung anen. May 29 nü parnok North Sikkim nung Lachung tesemi apusoa ao. Mongolbarnü parnok Gangtok-i meyipa aruba mapang aonung 10:00 ako shi nung iba lendong atalok.
Tasertemji Odisha nungi Michael Bag, Shefali Bag, Soven Raj Bag aser B Sujata aser North 24 Parganas nungi Tripana Dandapath (6) aser Jasmita Dandapath liasü, ta police-i metetdaktsü.
Gari tsükokba kuli tang tashi mejanjateter, ta Sikkim, east district, superintendent of police D B Giri-i ashi. Lendong nung densemba raliwalir kinungertem nem osang agütsüogo aser parnok Bodhbar nikongtsütsü tashi nungbo Gangtok atongtsü imlar.