Gari tsüktepba lendong ajanga güntok tezü ka ngutet

Guwahati, March 14 (Agencies): Mongolbarnü Assam, Kamrup district nung gari tsüktepba lendong ka ajanga, tezü ka dang adenba güntok tepseta iba indang tezü shibelenba, ken o ka jungkai adokogo, ta police-i metetdaktsü.
Guwahati anasa Kamrup district, Baihata Chariali tesem nung Mongolbar anepdang 6:30 akoshi nung Gari ka bus den tsüktepba nungi police-i güntok tezü ka ngutet.
“Lendong ajuruba gari nung mena alir par asem asü aser parnok rongnung ka Guwahati nung nija mozüki ka nung tasü taküm na tsüngda lir,” ta police-i ashi. Iba dak sendakba nung okadak ken o ka benoka bushisüngdangdar.
“Onoki parnok ket nung güntok tezü ka nung azü keter angu. Iba den külemi prangpong ka aser kar mesükba powder temesüng ngutet. Onok gari lendong atalokba tesem atongdangbo parnok rongnung anabo süadoker liasü. Iba sülen onoki tekaritba nung tanungba nisung anaji gari nungi agiteta mozüki-i bener ao, saka kabo mozüki tonger süadok aser tang taküm alisangji tasü aser taküm na tsüngda lir,” ta police-isa metetdaktsü.
Police temi ashiba agi parnok ajakji Manipur nungi liasü.
Forest department-i ashiba agi, tang tashi state nung güntok kümzüka ayuba tesemtem nungi güntok tepseta tezü bener aoba osang kecha mali.
Assam Forest Minister Pramila Rani Brahma-i forest department dang Kaziranga National Park, Orang National Park aser Pabitora Wildlife sanctuaries tem nung güntok tepsetba kecha ali maliar bushisüngdangtsü asoshi metetdaktsüogo.