Garo Hills nung arishi küm 17 tain tetsür ka pur ao; kinungertemi police dang mepelar

Tura, March 29 (Agencies): March 27 nung arishi küm 17 tain kaketshir ka arishi küm 40 tain tebur kati pua bener ao aser iba asalentong nung densema lir ta temolung melemteti aliba tetsür ka dang police temi asüngdangya masüba asoshi tetsürlar tsüraburtemi police dang mepelar.
Arishi küm 17 tain tetsürla ya March 27 nung school nungi kidangi meyipa shilangba mapang Sahinur Mondal-i tashiyim agi pua bener ao, ta tetsürlar tsüraburtemi Phulbari police station nung ken o agütsü.
State nung iba ama lendong aika atalokba mapang ka nung West Garo Hills kübok Phulbari anasa Chibinang yimtsüng nung iba lendong atalok.
Tanutsüla ya Hombarnü school nungi kidangi meyiba aruba mapang lar ali kibur, arishi küm 50 tain, Ruksana Begum-i la ya apu aser Sahinur Mondal nem agütsü. Iba sülen Mondal aser par medemertemi la ya Assam-i anir ao, ta tanutsüla tetsü-i FIR agütsüba nung shia lir.
Iba tanutsüla pua agütsüba ya nisung karibo nguogo.
Iba ken o benokba ya police temia tejangja metetdaktsüogo. Iba tesem nung aliba police kar Assam nung aliba Dhubri tesemi iba tetsürla bushitsü asoshi ogo. Ruksana Begum ya jena ogo aser la mangu bushitepba mapang ka lir.
“Iba asalentong nung shilem agir nisung asem bushiba mapang ka lir. Tanutsüla kümzüktsü asoshi kanga meranga mapa inyakdagi,” ta police temi ashi.
Ali kiburla dang asüngdangya masüba asoshi tanutsülaer kinungertemi police dang mepelaba metetdaktsüogo.
“La pua bener aoba mapang Ruksana Begum-i yaritepba nguogo aser la koleni pur oa aji Begum-i meteda alitsü, saka police temi la dang kecha asüngdangya masüba ngua onok kanga süngmanger,” ta tanutsüla kinunger kati ashi.
Sahinur-i tamalena tetsürla den kibong akümtsü asüngdanga liasü, saka la school züngdaktsünüba ajanga kibong akümtsü ya nokdanga liasü.