Garo Hills nung GNLA züngsem ka kahset; ka apu

Shillong, January 16 (Agencies) : Meghalaya kübok East Garo Hills district nung police-i Garo National Liberation Army (GNLA) züngsem ka kahset.
Tawa Williamnagar shishilemba tesem nung IED tesashi ka pokdaktsüba aser ano Block Development Officer (BDO) ka pur aoba inyakyim nung tanü kahsetba GNLA züngsem dak tai tonglokja liasü, ta police-i ashi.
Osang kar angazükba sülen Meghalaya Police nungi Swift Weapons and Tactics (SWAT) commandos-i GNLA pur tesep ka amakia ao. Police iba tesem tonga aodang telungpurtemi injang kahloktsü, ta police ketdangser kati ashi.
Police-i meyiper telungpurtem den kahtepdang nisung ka kahset aser ka yirutsü. Tasüsangji Kandem ta jangjaogo aser paji improvised explosive devices (IEDs) yanglur mongin ka liasü, ta Inspector General, Operations, G H P Raju-i ashi.
Iba tesem nungi prangpong ka ngutetogo aser Kandem den yariteper Chondro aputsü atema police-i bushisüngdang südar, ta paisa ashi.
Taoba hopta Williamnagar nung IAD tesashia ka pokdaktsübaji Kandem-i yangluba asütsü amai temulung melemi bilemer. Iba lendong nung nisung 9 yiru, ta Raju-isa metetdaktsü.
Yaküm October ita South Garo Hills nungi GNLA-i BDO, Jude Rangku T Sangma pur aoba mapa nunga pa nem tai tonglokja liasü, ta paisa shisem.
GNLA ya 2010 küm tentet aser iba telok ya Meghalaya kübok Garo Hills district pungu nung mapa inyaker.
Ano, South Garo hills nunga tanü GNLA züngsem ka apu. Iba nisung ya Balmepa ta jangjaogo aser pai nisung pur aoba aser tashiyim agi sen saruba mapa balala nung shilem agi, ta Ravi-isa ashi.
Balmepa ya GNLA atemja tongtipang nisung ka lir. Pai yi ayokba dokan kibur aser shishilembartem indang osangtsüsang GNLA commander Jimmy dangi aben aser parnoki tashiyim agi sen saru, ta paisa ashi.
Balmepa-i nakmati aturtem amokmerena parnok dang nungi gelatin sticks meshi aser itemji GNLA ketdangsertem nem agütsü, ta Meghalaya Police ketdangserisa metetdaktsü.