Garoland state pusemertemi New Delhi nung longkak aittsü

Tura, Aami (June) 5 (Agencies): Telangana state kümtettsü atema longkak aitba mesüka Garoland state balaka kümtettsü asoshi akhangba teloki Rasemnü New Delhi, Parliament street nung longkak aitba sentong ka ayongzüka akatsü asoshi telemtetba agiogo.
Garo Hills Statehood Movement Committee (GHSMC) nungi volunteer noklang dak tema iba sentong nung adentsü atema New Delhi yima ogo. GHSMC puri tang Meghalaya kübok Garo nunger aliba tesem nungi Garoland state balaka kümtettsüba atema khanga arudar.
“Garo nungeri yimden yimsüsüba tsütsü state balaka akhangba ya otsü tasen ka masü. Iba ya küm aika lokti balala aser political party balalai khanga arudar, saka Centre aser state nung sorkar balalai nüburtem takhangba sentoka arudar,” ta GHSMC lenir Nikman Ch Marak-i ashi.
GHSMC mendenbubai ashiba agi, Garoland state pusemertem meyirejang aika New Delhi Ramlila ground nung Aami (June) 6 nü adenshitsü aser iba mapang nung lenirtemi state balaka akhangba metetdaktsütsü. Item nüburtem ya timba Garo nunger asütsü aser lokti ya Parliament street ajanga jajayonga aotsü.
State balaka akhangba Meghalaya adena kodanga modang, saka GHSMC puri tang national yimtiba nung oa parnok ola angashidaktsütsü asoshi telemtetba agiba ajanga yimden yimsüsüba tsütsü temelenshi ka bener arutsü imlar.
Garoland state balaka akhangba ya Garo Hills nung political party tejentiba Garo National Council puri 70’s tetenzüklen Meghalaya state kümtetba mapang nung tenzük. GNC tir aser Chokpot MLA, asür Clifford Marak ya Khasi-Jaintia nunger nungi pila Grao nunger atema state balaka kümtettsüba atema nokdaker rongnung ka liasü. Kasa mapang nung pa pusema Khasi Hills nung amendaker aliba political party HSPDP aser party tekolakba Hopingstone Lyngdoh-ia Khasi state balaka khanga liasü.
Lenir tejen ana ya asüba sülen tang lanurtemi state balaka asoshi maneni khanga arudar.