Gary manemba ajanga Lynyrd Skynyrd tour thinener

October 15, 2015: Lynyrd Skynyrd telok nung guitar atemer Gary Rossington temulungjang nung timtem adokba ajanga parnok concert ana thinenogo.

2003 küm pa temulungjang tezü operation (heart bypass) agia liasü. Tan ano kasa timtem adokba sülen doctor temi operation agi aser iba mapang tesüiba mapang tezü melena enoktsür aliba nisungi yangluba tezü ana yanglushitsü aser iba den külemi tasen ka enoksemtsüogo.

Tan ita tatemlen ano nisungi yangluba tezü ka enoksemtsü atema Gary ya tangbo Atlanta, Georgia nung par kidang anisüngzükdar. Pa dak iba timtem atalokba ajanga October 16 aser 17 anogotem nung Indiana o Michigan na nung concert sentong aliba sangküm asoshi thinena atar.

Pa sapurtem dang pelaba metetdakja memunui pa telok den tena shilem agitettsü ta ashiba mapang, Gary-i, “Ni timtemba mapang aria bilemtsüa nungiter ajak dang kanga pelar. Ni tajungba kümdar aser doctor tem den kinungertemi ni kanga junga anepaludar. Ni meimlai anepadoker alitsü. Nenok ajak den memunui ajuruteptsü imla atar,” ta shisem.

Kentener Johnny Van Zant-i, “Pa dangbo junga lir….Pa kidang anisüngzükdar. Ajak jungatoktsü. Gary ya kanga dang tasü tait nisung ka lir. Pa tayimtsü aser gari lendong nungi kümzüka taküm aliba nisung ka lir. Tsüngrem tesüngmangtsü mapa ngur ni kanga süngmanga pelar. Pa kidang lia temulungjang mapa minyak akümba ya khen bilemtsübo tajung kechiba süra lenmang nung gari tanidak nung iba timtem atalok asüba koda süla, tamajungba ang kümer alitsüa shibai metet,” ta ashi.

Lynyrd Skynyrd-i tan thinenba tour ya Alabama nung November 7 nü nungi tenzüktsü sentong lir.

Gary ya 1977 küm Mississippi anasa tayimtsü lendong ka nungi kümzüka liasü. Iba lendong nung tangar asem den par telok nungi Ronnie Van Zant, Steve Gaines aser Cassie Gaines nunger taküm sama.